Мектебда гуьруьшар давамарзава

И йикъара Ахцегь райондин АТК-дин векилри Хуьруьгрин мектебдин чIехи классра кIелзавайбурухъ галаз гуьруьш кьиле тухвана.

«Лезги газетдиз» райондин администрациядин пресс-къуллугъди хабар гузвайвал, МР-дин кьил О.Абдулкеримован теклифдалди АТК-дин векилри вири хуьрера экстремизмдинни терроризмдин идеологиядиз аксивал къалуруниз талукь мярекатар тешкилун давамарзава. ИкI, 17-апрелдиз профилактикадин кIвалах Хуьруьгрин мектебда кIелзавай аялрихъ галазни кьиле фена. Ана райондин АТК-дин векилар тир Шимсидин Арухова, Играмудин Мегьамедова, районда РД-дин Муфтиятдин марифатдин отделдин векил Хуснидин Ашуралиева иштиракна.

Акьалтзавай несил чIуру таъсирдик акат тавунин месэладиз кьетIендаказ фикир гун лазим я. Гуьруьшдин кьилин макьсадни жегьилрик ватанпересвилин гьиссер кутун, абуруз жемиятда чеб тухудай къайдаяр чирун я.

Гуьруьшдин вахтунда терроризмди алай девирда инсанрин кьилел гъизвай бедбахтвилерикайни зулумрикай, магьрумвилерикайни барбатIвилерикай ихтилатар кьиле фена. АТК-дин векилри жегьилри гьар са чIавуз уяхвални мукъаятвал квадар тавун, жуван хсуси хатасузвилин къайдаяр хуьн важиблу тирди лагьана.

 «Лезги газет»


Всего просмотров: 20

Читайте также: