16-сентябрдиз РД-дин Кьил Сергей Меликов нубатдин сеферда Ахцегь райондиз мугьман хьана. Ина ада яшайишдин ва туризмдин са жерге объектар ахтармишна, чкадин агьалийрихъ галаз ихтилатар авуна ва муниципалитет еримлу авунин барадай совещание кьиле тухвана. Идакай «Лезги газетдин» редакциядиз РД-дин Кьилин пресс-къуллугъди хабар гузва.
Республикадин регьбер кIвалахдин рекьяй Ахцегьиз финин асул макьсад райондин кьиле авайбуруз идалай вилик гайи тапшуругъар тамамарунин гьалдихъ галаз таниш хьун тир.
Сифте нубатда С. Меликова Ахцегьрин къадим тарих авай къеле цIийикIа туькIуьр хъийизвай дестедихъ галаз и объект хуьнин месэла веревирдна. Ахцегьрин къеле мугьманар ва Дагъустандин агьалияр желбдай центрадиз элкъуьрдай фикир ава. Федеральный дережадин метлеб авай медениятдин ирсинин объект алай вахтунда туькIуьр хъувунин кIвалахар давам жезва. Къейд ийин хьи, къеледин бине 1839-йисуз кутуна. Ам Россиядин Империядин виридалайни кьиблепатан оборонадин имарат хьана.
РикIел хкин, къеле авай гьалдиз Сергей Меликов 2 йис идалай вилик килигнай. ЧкIидай гьалда авай къеле республикадин Кьилин тапшуругъдалди гуьнгуьна хтунин месэладив эгечIна. Алай вахтунда тарихдин памятник гуьнгуьна хтунин проект чкадин меценатди арадал гъанвай фондуни туькIуьрзава. Адан мулкара ихьтин кIвалахар кьилиз акъудун фикирдиз къачунва: къенепад ва патарив гвай чкаяр аваданламишун, музейдин комплекс эцигун, чкIанвай килиса гуьнгуьна хтун, ресторанар, кафеяр, туриствилин центраяр, ядигаррин дезгеяр, цавуз шарар ахъайдай майдан галай парк арадал гъун, военный кадетский училищедин дараматдин казармадин корпусар туькIуьрун. Тухванвай кIвалахрикай галай-галайвал тешкилатдин-проектировщикдин директор, архитектор Ирина Агафоновади ихтилатна.
Республикадин Кьили «Мектебрин образованидин къурулушар цIийи хъувун» федеральный проектдай ремонт авур Ахцегьрин 2 мектебдин дараматдизни къимет гана. Малум хьайивал, вири нукьсанар арадай акъуднава, мектебри аялар, муаллимар ва диде-бубаяр шадарзава. РикIел хкин хьи, ихтилат физвай мектебрикай сад кьвед лагьай сеферда ремонт хъувуна: 2022-йисуз авур кIвалахрилай Сергей Меликова наразивал авунвай ва объект дуьздаказ ремонт авунин месэла эцигнай. Адан тапшуругъдалди республикадин бюджетдай 39 миллион манат чара авунай. Идал «Содействие и помощь» фондуни алай аямдин кIелунин ва медицинадин тадаракар маса къачур такьатарни алава хъхьана.
Гуьгъуьнлай С.Меликов Ахцегьа кардик квай Дагъустандин аграрный колледждин отделенидиз фена. Ина хуьруьн майишатдин хилез талукь пешекарар гьазурзава, гьа жергедай яз — ветеринарар, агрономар, сварщикар. И отделенида кIелайбурун арада машгьур ксар гзаф ава. Гьа жергедай яз, Россиядин Игит Муслим Муслимовни анин выпускник я.
Ахцегьа авай вахтунда республикадин регьбер райондин центральный азархана эцигзавай гьалдихъ галазни таниш хьана. ЦIувад йис идалай вилик эцигиз гатIунай объект гьеле акьалтIариз хьанвач.
Сергей Меликова Ахцегь районда РикIел хкунин багъда СВО-дин кьегьалрин мемориалдив цуьквер эцигна, дяведин махсус серенжемдин иштиракчийрин багърийрихъ галаз ихтилатар авуна. И багъда агьалийриз ял ядай шартIар тешкилнава.
Эхирдай республикадин Кьили райондин администрацияда совещание кьиле тухвана, гьукумдин органрин кьиле авайбуруз са жерге тапшуругъар гана.
Салим Салимов
