Гьеле  алатай асирдин 80-йисарилай  инихъ чилин къадир авай ва зегьметдал рикI алай Эминхуьруьн агьалияр чпиз ракъинин кагьрабаяр лугьузвай ципицIар гьасилунал машгъул я. Са вахтара хуьруьн мулкунал районда кIвенкIвечибурукай тир «Аламишинский» совхоз кардик квай.

Хуьруьн майишат тармар авур «перестройкадин» йисарилай­ гуьгъуьниз, 2000-йисара, инвесторри, КФХ-ри ва арендаторри хуьруьн мулкуна уьзуьмлухар кутун хъувуна, къе Эминхуьр уьзуьмлухрин юкьва ава. Алимет Аллагьвердиеван, Надир Яхьияе­ван­ лежбервилинни фермервилин ма­­йишатри, арендаторар тир Да­гъус­тан Республикадин хуьруьн майишатдин лайихлу работник Алимирзе Агъамирзоева, Расим Гьамзатова, Назир Гьамидова, Ми­ламудин Мегьамедова, Жамал Тагьирова ва масабуру гьар йисуз ципицIрин бул бегьер гьасилзава, кIватI хъийизва.

И йикъара Эминхуьруьн уьзуьм­­­чивилин майишатри­ ­ва арен­­даторри вири къуватар­ ци­пи­­­цIар кIватI хъувунал желб­­нава. Чи къенин суьгьбетни арен­датор ­Алимирзе Агъа­мирзоевакай­, адан уьзуьмлухрикай ва чешнелу хизандикай я. Абур вири санал «гъиле» вучиз кьунватIа, макъала кIелайла, чир жеда.

Алимирзе Жамалович хуьруьн майишатда «жуванди» я. Ада хуьруьн юкьван школа, Туладин областда хуьруьн майишатдин техникум акьалтIарна, саки 20 йисуз «Аламишинский» совхозда уьзуьмчивилин бригададин бригадирвиле, кьилин агрономвиле, зоотехниквиле ва 6 йисуз гзаф хилерин майишат тир «Зардиян» ООО-да кьилин агрономвиле кIвалахна.

2018-йисуз А. Агъамирзоеваз, «Зардиян» ООО-дин кьилин агрономдиз, къазанмишай агалкьунрай «Дагъустан Республикадин хуьруьн майишатдин лайихлу работник» тIвар гана. КIвалахдай руьгьдин таъминвал жагъанвай ада эхиримжи ругуд йисуз вичин хайиди тир хуьре арендатор яз зегьмет чIугвазва.

Чун адан кIвачихъ галай 8 гектар уьзуьмлухрин участокда ава. Тегьенгрик дигмиш хьанвай гьар жуьре сортарин ципицIрин кулар ква. Хъсан бегьер тежрибалу уьзуьм­чидин дурумлу зегьметдин нетижа я.

— За жувалай тариф авун яз гьи­сабмир, зун гзаф йикъара экуьни­лай няналди жуван участокда жезвайди я, — лугьузва Али­мир­зе Жамаловича. — КIвалах ла­гьайтIа, уьзуьмлухра гьар юкъуз авайди я, гьам гатуз, гьам хъуь­тIуьз.

Чун фейила, ципицIар атIунал 12 кас машгъул тир. АтIай ци­пицI­рин гьакъи-пул абуруз гьар юкъуз гузва. Зайнаб Абдулаевадин, Валида Бабаевадин, Наби Зангиеван, Нурижат Къурбановадин­, Марина Агъамирзоевадин кIвалах­дилай чаз А. Агъамирзоева разивилин келимаяр лагьана.

АтIай ципицIар Белиждай куьмекдиз гъанвай шофер Хейрудин Эмирбегова, энгел тавуна, Дербентдин чехирар хкудзавай заводдиз тухузва.

Тежрибалу уьзуьмчи — арендатор инанмиш тирвал, вилик йисара хьиз, цIини гьар са гектардай 80 центнердилай виниз ципицIар кIватI хъийида.

Алимирзе Агъамирзоевакай­, адан гьакъисагъ зегьметдикай макъала кхьидайла, зи рикIел журналист ва шаир Жалил Мура­далиеван шиирдин цIарар хтана: «Алакьдай кас зегьмет чIугваз, Бахтлуни я, зурбани…».

Ада вичин уьмуьрдин юлдаш, тежрибалу уьзуьмчи Эльмирадихъ галаз ферли 4 велед тербияламишна. Вадим ва Расим СВО-дин иштиракчияр я. Сифте йикъа­лай махсус серенжемдин зонада авай чIехи гада Вадим «Дяведин махсус серенжемдин иштиракчи» ва Жукован медалдиз лайихлу хьанва.

Расим Агъамирзоевани СВО-дин зонада жуьрэтлувилер къалурна. ЦIи адаз “Дагъустандин халкьдин Игит” лагьай тIвар гана.

ЦипицIар кIватI хъийизвай арендадин участокда чал Игит хва Расимни гьалтна. Ам хуьруьз отпускдиз хтанва — Донбассда хьайи хер сагъар хъувурдалай гуьгъуьниз. Дахдиз ципицIар кIватIиз куьмек гузва.

— ЦипицIрин бегьер, абур кIватI хъийизвай рабочийринни механизаторрин зегьмет, къаст акурла, гуьгьуьл шад жезва. ГьикI лагьайтIа, им чи халкьдин патай Россия кIеве твада лагьана фикир-хиял авурбуруз ачух жаваб я, — лагьана чаз Расим Агъамирзоева.

Алимирзе Жамаловичан кьве руш, чпин кIвал-югъ, хизанар хьана, яшамиш жезва. Са рушан итимни СВО-дин иштиракчи я.

Алатай йисуз Алимирзе Агъамирзоева вичин хсуси “Нива” машинни, чи аскерриз куьмек яз, СВО-дин зонадиз рекье туна.

Алимирзе Жамалович михьи рикI, хъсан къилих, ачух гъил авай кас я. Адаз намуслу зегьметдай ва ватанперес рухваяр тербияламишунай чна сагърай лагьана.

Хазран  Кьасумов