4-сентябрдиз СтIал Сулейманан райондин Мамрачрин хуьруьн сивел, чIехи шаир СтIал Сулейманаз хкажнавай тимталдин патав, райондин кьил Саид Темирханова, Кьиблепатан Дагъустандин районрин кьилер Фарид Агьмедова, Мегьамед Шамилова, Абдул-Керим Палчаева, Замир Азизова, «Дидейрин къуват» тешкилатдин векил Мегьрибан Муслимовади, Россиядин Игит Муслим Муслимов далдам-зуьрнедалди  къаршиламишна.

Инлай вири Кьасумхуьруьн Ватандин ЧIехи дяведин къурбандриз хкажнавай тимталдал фена, телеф хьайибуруз, кьил агъуз­на, икрамна, эбеди цIун патав цуькве­рин кIунчIар эцигна. Мярекат райондин ад­ми­нис­трациядин сиве-сивди ацIанвай залда давам хьана. Ина Дагъустан Респуб­ли­кадин Гьукуматдин Председателдин заместитель Нариман Абдулмуталибов, Халкьдин Собранидин депутат, жемиятдинни сиясатдин деятель Имам Яралиев авай.

Шад мярекат Саид Темирханова ачухна ва кьиле тухвана. Вичин тебрикдин гафуна ада къейд авурвал, чIехи шабагь —  Россиядин Игит лагьай тIвар ганвай старший лейтенант Муслим Мусли­мов, адан багърияр (уьмуьрдин юлдаш, би­цIи аял, диде-буба…) къе бубадин ватанда чина хъвер аваз, хушвилелди кьабулзава.

— Хиве авай везифаяр гьамиша викIегь­да­каз тамамариз, миллетбазар кукIварзавай женгера къазанмишнавай гъалибвилерай Муслим Муслимов сифте — «Дирибашвиляй», 2023-йисуз-«ВикIегьвиляй» ва алай йисан майдиз Суворован медалриз лайихлу хьана. — давамарна С. Темирханова. — Алай йисуз миллетбазрин мягькем кар алай муьжуьд чка кукIварунин женгера къазанмишнавай агалкьунрай Муслим Муслимоваз Россиядин Игит лагьай тIвар гана.

Махсус серенжемда райондай 500-далай виниз агьалийри иштиракзава. И жергеда чи Игитдин бубадин хуьряйни 11 кас ава. Абурукай гзафбуруз чIехи шабагьар ганва. Саки гьар гьафтеда военный частарин командиррилай чаз разивилин чарар хквезва. И кардай чи агьалийри махсус серенжемда жуьрэтлувал, дирибашвал къалурзавайди аквазва.

Муслим Муслимоваз ганвай Игитвилин тIвар мубарак авуналди, заз махсус серенжемда иштиракзавай вири аскерризни офицерриз  рикIин сидкьидай сагърай лугьуз кIанзава.

Нариман Абдулмуталибов. — Гьуьр­метлу районэгьлияр, Муслим Жавидович къе жуван ватанда дустарихъ, райондин чIехи коллективдихъ галаз санал хьунал зун пара шад я. Дагъустандин Кьил Сергей Меликован тIварцIихъай, гьукуматдин руководстводин патай ваз Россиядин Игит лагьай тIвар рикIин сидкьидай мубаракзава. Игитдиз чими гуьруьш тешкилай районэгьлияр, кьегьал рухвайрин, яратмишзавай интеллигенциядин патахъай къайгъударвал чIугвазай квез ва Имам Музамудиновичаз сагърай лугьузва.

Муслим, вуна ви жуьрэтлувилелди, кьегьалвилелди чи район, Дагъустан, Россия машгьурна. Ви кьегьалвилерилай чешне къачуна, гзаф дагъустанвийри ви баркаллу рехъ давамардайдахъ инанмиш я. Вун хътин чи кьегьал рухвайри миллетбазрал гъалибвал къазанмишда. Куьн чи дамах я. Залда ацукьнавай жаванар квез дамахдивди килигзава. Абуру валай чешне къачуда. Лезги халкьдин къагьриманвилин эпосдин игит Шарвили, полководец Гьажи Давуд ва лезги халкьдин маса кьегьал рухвайрин кар вуна баркаллудаказ давамарзава.

Имам Яралиев. — Гьуьрметлу дустар! Къе чна чи ватанэгьли, баркаллу хва Россиядин Игит Муслим Муслимов чIехи гьуьр­метдивди къаршиламишзава. Ада, кьинез вафалу яз чандилайни гъил къачуна, Ватандин хаталувал хуьз къуллугъзава, Военный частара вичин къуллугъ аскервилелай гатIунай ам ингье са куьруь вахтунда старший лейтенантдин чиндив агакьнава. Им женгера вичин къуллугъдин юлдашар хвейила, женгинин гьерекатар тешкиллувилелди кьилиз акъудайла, душманриз ва абурун  техникадизни аквадай хьтин зарар гайила, жезвай кар я. Россиядин Игитвилин тIвар виридалайни чIехи шабагь я. Ам къизгъин женгера жуьрэтлувал, кьегьалвал,  викIегьвал къалурайбуруз гузва. Чи кьегьал хва гьахьтинбурун жергедай я.

Чи халкьдин агъзур йисарин тарихда, чил, Ватан, жуван хизан хуьн гьамиша итимрин хиве авай везифа тир. Муслим хва, вуна чи халкьдин баркаллу крар давамарзава. Чна чи Игитдал дамахзава.

Дагъустандай гзафбуру махсус серенжемда иштиракзава. Телеф хьайибурун­ тIва­­рар, къаматар чи рикIера эбеди я.  Ас­керрихъ галаз гуьруьшар тухузва, абурун хизанриз куьмекар гузва. СВО-диз куьмек ракъурзава. За Муслим Муслимоваз, чи мя­рекатда иштиракзавай адан багърийриз чIехи тIвар мубаракзава». Ваз ватанпересвилин тербия ганвай диде-буба сагърай!

Абдул-Керим Палчаев. — Шад хабарди къе зунни Кьасумхуьрел чIугуна. Квехъ галаз зани жуван ва Ахцегь райондин жемятдин патай лезги чилин кьегьал хциз, старший лейтенант Муслим Муслимоваз Россиядин Игит лагьай чIехи тIвар мубаракзава. СВО-да иштиракзавай 12 дагъустанвидиз Россиядин Игит лагьай тIвар ганва. Абурукай пуд лезги чилин яд, лезги дидедин нек хъванвайбур я. Умудзава хьи, махсус серенжем гъалибвал чиди яз акьалтIарда.

М.Муслимоваз игитдин тIвар гьакIни Сайтархуьруьн агьалийрин патай райсоб­ра­нидин депутат, муаллим Назим Гьажимирзоева, райондин ветеранрин Советдин председатель Ислеман Ризаевани тебрикна.

Муслим Муслимов. — Гьуьрметлу ватанэгьлияр, заз чими гуьруьш тешкилай куьн сагърай! Заз залда ацукьнавай юнармейцийризни жаванриз хъсандиз кIела, кIва­лаха, хиве авай везифаяр намуслувилелди кьилиз акъуд лугьуз кIанзава. Гьикьван четинвилер ацалтайтIани, бушвал ийимир. ИкI хьайитIа, квекай халисан, Ватандал рикI алай кьегьалар жеда. Сагърай куьн вири! Гъалибвал чи пата жеда!

Гуьруьшдин эхирдай мергьяматлувилин «Умуд» фондунин патай Имам Яралиева  М. Муслимовав — пулдин пишкеш, С. Темирханова райондин администрациядин патай Гьуьрметдин грамота, художникди чIугунвай СтIал Сулейманан шикил ва маса савкьатар вахкана.

Мярекатдин тебрикрин арайра и цIара­рин авторди Абдуселим Исмаилован гафариз кхьенвай «Донбассдин Игитриз», Кьасумхуьруьн аялрин яратмишунрин кIвалин векил Жамал Агъабегова «Жанаби Президент» манияр лагьана, 10-классдин ученица Саида Динмегьамедовади, Агъа СтIал­рин школадин 4-классдин ученик Замир Набиева ва 10-классдин ученица Сараханум Гьамзатовади фасагьатдиз ватанпересвилин шиирар кIелна.

Къагьриман  Ибрагьимов