Дагъустандин Гьукуматдин Председатель Абдулмуслим Абдулмуслимов и йикъара Дербент райондиз мугьман хьана. Идалай вилик ада, чкадал фена, ципицIар кIватI хъийизвай гьалдихъ галаз мукьувай таниш хьун хиве кьунай. ИкI, премьер-министр Нариман Алиеван тIварцIихъ галай АО-дин ципицIлухриз килигна.
Малум тирвал, Дагъустан жуьреба-жуьре сортарин ципицIар гьасилзавай тарихдин центрайрикай сад я. Санлай къачурла, ципицIар гьасилзавай вири майишатрин умуми майданри 37 агъзур гектар кьазва. Ракъинин кагьрабаяр кIватI хъувунин жигьетдай кIвенкIвечи чкадал Дербент район ала — республикада ципицIрин 35 процент и районда гьасилзава.
РД-дин Гьукуматдин пресс-къуллугъди хабар гузвайвал, алай йисуз бегьердин кьадар артух хьун вилив хуьзва. А. Абдулмуслимован гафаралди, тайин тир делилралди, республикада гьелелиг санлай 101,7 агъзур тонн ципицIар кIватIнавайди малум я. Шаз и вахтунда 62,7 агъзур тонн кIватIнавай. Санлай цIи 290 агъзур тонндилай гзаф бегьер хьун гуьзлемишзава.
А.Абдулмуслимов Дербент райондин мулкара 311 гектардин майданда ципицIрин цIийи багълар кутазвай инвестицийрин чIехи проект кьилиз акъудзавай гьалдихъ галазни таниш хьана. Государстводин патай куьмек яз, «ККЗ» АО-диз (инвестор) савдаяр галачиз чилин участок ганва. И проектдай цIи 100,3 гектарда ципицIар цанва, алатай йисуз 145 гектарда цанай. Проект кьилиз акъудзавай гьалдиз РД-дин Председателди еке къимет гана.
А.Абдулмуслимова ципицIар кIватIунал машгъул зегьметкешрихъ галаз ихтилатарна. Мисал яз, Табасаран райондай тир са дишегьлиди, кIватIнавай емишрин кьадардилай аслу яз, са юкъуз вичи 2500-3500 манат гьакъи къачузва лагьана.
Малумарзавайвал, алай вахтунда Дагъустанда ципицIар кIватI хъувунал 15 агъзур кас желбнава.
Чи мухбир
