Дагъустандин Кьил Сергей Меликован Указдалди 15 йисуз РФ-дин МЧС-дин РД-да авай Кьилин Управленидиз регьбервал гайи генерал-майор Нариман Магьмудович Къазимегьамедов Дагъустан Республикадин МЧС-дин министр яз тайинарнава.
Н.Къазимегьамедова уьлкведин МЧС-дин къурулушда фадлай кIвалахзава. Винидихъ тIвар кьунвай Управленидин кьиле авайла, ада гьа са вахтунда республикадин МЧС-дин министрдин везифаярни тамамарна. Н.М. Къазимегьамедован бине Хив райондин КьванцIилрин хуьряй я. Ада Камышин шегьердин высший военный училище акьалтIарна. Гуьгъуьнлай Советрин Союздин кьушунрин дестейрик кваз Германияда къуллугъна. 1995-йисалай РФ-дин МЧС-дин къурулушда кIвалахзава. Са шумуд сеферда Чечняда, Югославияда, Руандада къутармишдай серенжемра иштиракна.
* * *
Сергей Меликован Указдалди РД-дин тIебиатдин ресурсрин ва экологиядин министрдин везифаяр вахтуналди тамамарзавайди яз Ратмир Нуралиевич Расулов тайинарнава.
Р.Расулова виликдай РД-дин МВД-дин УЭБиПК-дин экономикадин тахсиркарвилерин вилик пад кьадай отделдиз регьбервал гузвай. Адан бине Агъул райондай я.
РикIел хкин, виликдай РД-дин тIебиатдин ресурсрин ва экологиядин министерстводиз са девирда Тарумовский райондин администрациядин кьил яз кIвалахай Александр Зимина регьбервал гузвай.
* * *
Дербент шегьердин собранидин депутатри шегьердин кьил яз Агьмед Абдусейнович Къулиев хкянава. Заседанида иштиракай 25 депутатди адан кандидатурадин тереф рейсадвилелди хвена.
А.Къулиев алай йисан 5-июндиз Дербент шегьердин кьилин везифаяр тамамарзавайди яз тайинарнай. Акьван чIавалди ада жуьреба-жуьре йисара РД-дин МВД-дин экономикадин тахсиркарвилерин, тешкиллу тахсиркарвилерин вилик пад кьадай управленийриз, экстремизмдиз аксивалдай Центрадиз регьбервал гана. 2017-йисуз ам РД-дин МВД-дин полициядин начальникдин заместитель яз тайинарнай. А.Къулиеван бине Ахцегь райондин Смугъулрин хуьряй я.
