Кьилин редактордин гаф
Са шумуд йис идалай вилик Дагъустан уьлкведа терроризмдин жигьетдай хаталувал авай регионрикай сад тир. Чпи чеб хъиткьинарзавайбур, къанун-къайда хуьзвай органрин векилрин чандиз къаст ийизвайбур, гзаф инсанар кIватI жезвай чкайра терактар кьиле тухузвайбур… РикIе чIуру къастар авай къанлуяр себеб яз, гзаф хизанрин кьилел бедбахтвилер атана. Терроризмдин вилик пад кьун патал Дагъустанда гзаф кьадар серенжемар кьабулна. Нетижада гьаларни дегиш хьана: эхиримжи са шумуд йисуз республикада теракт хьайи, террористриз акси махсус серенжемар кьиле тухвай дуьшуьшрикай ван-сес амачир. Гзафбуру терроризм Дагъларин уьлкведа михьиз тергнавайди яз гьисабзавай. Амма…
Подмосковьеда арадал атай вишелай виниз инсанар телеф хьайи терактдилай кьулухъ уьлкведин са жерге регионра террористри чинебадаказ кIвалах тухузвайди винел акъатна. Гьа жергедай яз — Дагъустандани. 31-мартдин экуьнахъ Махачкъала ва Каспийск шегьерра къанун-къайда хуьдай органрин векилри махсус серенжемар (КТО) кьиле тухвана. Кьилди къачуртIа, Каспийскда Агьмед-Хан Султанан тIварцIихъ галай куьчеда авай са кIвале чуьнуьх хьанвай кьуд террорист кьадай мумкинвал хьана. Чешмейри хабар гузвайвал, абурукай пуд кас – Юкьван Азиядин са уьлкведин агьалияр, сад дагъустанви я.
РФ-дин ФСБ-дин Управленидин пресс-къуллугъдин делилрай якъин жезвайвал, Дагъустанда кьунвай террористринни Подмосковьеда кьиле тухвай терактдин арада алакъа авай. Кьунвайбурукай сада хиве кьурвал, абуру «Крокус Сити Холл» дараматда теракт авун патал Дагъустандай Мытищи шегьердиз яракьар рекье туна. Идалайни гъейри, абурухъ Каспийск шегьерда инсанар гзаф кIватI жезвай чкада теракт ийидай къаст авай. Чкани абуру виликамаз хкянавай — Каспийск шегьерда гьуьлуьн къерехда авай парк. Гена, шукур Аллагьдиз, абурун къаст кьилиз акъатнач.
Къейд ийин хьи, террористри Каспийск шегьерда кIвал кирида кьунвай. Анай яракьар, хъиткьинардай затIар гьазурунин карда герек къвезвай гзаф деталар жагъана. КТО кьиле тухузвай чIавуз бандитар чуьнуьх хьанвай кьакьан гьавайрин кIвалера авай вири агьалияр куьчедиз акъуднавай.
И дуьшуьшдай аквазвайвал, террористар ксанвач, абуру чинеба чпин къанунсуз гьерекатриз гьазурвилер аквазва. Ихьтин гьалара чун вири уях хьунихъ, мукъаятвал хуьнихъ еке метлеб ава. Шегьердин чкада гзафбуру чпин кIвалер чпиз ерли течирбурув кирида вугузва. И кардив гьар са кIвалин иеси жавабдарвиливди эгечIун лазим я. КIвал кирида кьазвайди вуж ятIа, гьинай ятIа чирна, адан документар ахтармишна кIанда.
Дагъустанда КТО тухвайдалай кьулухъ, 1-апрелдиз, интернетда бандитри тешкилнавай са телеграм-каналда, гуя Каспийск шегьердин мектебра терактар кьиле фида лугьуз, агьалийрик кичIерар кутазвай малуматар пайда хьана. Гзафбурук гьакъикъатдани кичI акатна. Каспийск шегьердин са мектебда муаллим тир зи чирхчирди 2-апрелдиз вичин классда кIелзавай аялрин са пай тарсариз атанвачир лугьузвай.
Мартдин эхирра Махъачкъаладин аэропортуниз сада зенг авуна, ана хъиткьинардай затI кардик кутадайвал я лагьана. Полициядин векилри гьасятда, аэропортунин къенепата авай вири ксар куьчедал акъудна, ахтармишунар кьиле тухвана. Жагъай са затIни хьанач.
Ихьтин къалп малуматар эхиримжи варцара гзаф агакьзава. Къанун-къайда хуьдай органрин векилри къейдзавайвал, и гьерекатрин кьулухъ Украинадин нацистарни абуруз кискис гузвай душманар гала. Жемиятдин гегьенш къатара гъулгъула тун патал абуру интернетда еке кIвалах кьиле тухузва. Къаст гьалар пайгардикай хкудун я. Генани хаталу кар ам я хьи, абуру и крарал, жуьреба-жуьре хъсанвилер авун хиве кьаз, аялар, жегьилар желбзава. Гьавиляй аялри интернетда нихъ галаз алакъа хуьзватIа, ана абур квел машгъул жезватIа, гуьзчивиликай хкудна виже къведач. И месэладихъ еке метлеб ава. ИкI тирди 2-апрелдиз Махачкъалада Дагъустандин вузрин студентрин иштираквал аваз кьиле фейи терроризмдиз акси семинардини тестикьарна. Мярекатдал жегьилриз терроризмдикай, адан кьетIенвилерикай, нетижайрикай гегьенш чирвилер гана, абур гзаф месэлайрин гъавурда туна.
Са гафуналди, гьуьрметлу газет кIелзавайбур, чун яшамиш жезвай вахт секинди туш. Гьавиляй гьар са камуна чна мукъаятвал хвена кIанда. Къуй вири жуьредин балайрикай чун Аллагьди хуьрай!
Мегьамед Ибрагьимов
