Кьурагь райондин Арабляр хуьруьн юкьван школадин коллектив ва аялар дяведин махсус серенжемдин иштиракчи, Дагъустандин халкьдин Игит Эмир Гьайдаровахъ галаз гуьруьшмиш хьана.

Эмир Арабляр хуьре дидедиз хьана. Ада инин школада кIелна. Жаванзамаз спортдал, военный къугъунрал гададин рикI алай. Буба математик тир. И кардини Эмираз школада вич чешнелудаказ тухудай, хъсандиз кIелдай мумкинвал гана.

28-августдиз аскервилин везифаяр уьтквемвилелди кьилиз акъудзавай, душмандиз рикIелай тефидай ягъунар кьазвай Эмир Гьайдароваз республикадин жемиятдин «Хайи Дагъустан» гьерекатди «Дагъустандин халкьдин Игит» лагьай тIвар гана. Школадин коллективди ва аялри хуьруьнвидиз чIехи шабагь рикIин сидкьидай тебрикна.

Э. Гьайдарова хайи мектебдин коллективдиз Россиядин армияда къуллугъзавай ва махсус серенжемда иштиракзавай гьалдикай, вичин командиррикай, юлдашрикай суьгьбетна. Школьникрихъ элкъвена, игитди хъсандиз кIелун, къастуналди вилик фин, четин вахтунда Ватандин итижар хуьдай кьегьалар хьун алхишна.

Аялри Эмираз чпихъ лезги халкьдин тарихдай, адетрикай, яшайишдикай хъсан чирвилер авайди къалурна. Гуьруьш рикIел аламукьдайди хьана.

Хийир Эмиров