Дяведин шартIара Ватандин итижар хуьзвайбурун, душмандихъ галаз кьиле физвай женгера халис игитвал, уьтквемвал, ватанпересвал къалурзавайбурун гьакъиндай уьлкведин Президент Владимир Путина, РФ-дин ва регионрин гьукуматри къайгъу чIугвазва. Ам гьихьтин къайгъу ятIа, адакай милли газетдин чинрани кхьизва. ИкI, РФ-дин Президентдин Указдалди 2024-йисан 1-августдилай яракьлу къуватра къуллугъ авунин жигьетдай РФ-дин оборонадин министерстводихъ галаз икьрар кутIуннавай касдиз садра гузвай пулунин кьадар артухарнава, ам 400 агъзур манатдиз барабар я.

Махсус серенжемда къуллугъзавай дагъустанвийриз Дагъустан Респуб­ли­кадин Кьил Сергей Меликован тапшуругъдалди региондин бюджетдай  500 агъзур манат, районрин, шегьеррин муниципалитетрини 100 агъзурдав агакьна пул гузва, яни икьрар кутIуннавай касдив сифте вацра са миллион манат агакьзава.

Гьа идалди галайвилер куьтягь жезвач. Дагъустандин военком Даитбег Мус­тафаева гъавурда турвал, СВО-да иштиракзавай гьар са аскердиз вацра 210 агъзур манат мажиб гузва. Сержантрин, гъвечIи ва чIехи командиррин­, офицеррин мажибар мадни екебур я. Мисал яз, взводдин командирдин за­мес­титель тир сержантди вацра 245 агъзур манат къачузва.

Къуллугъзавай ксарикай самолет­ ягъайдав — алава 300 агъзур, верто­лет­ терг авурдав 200 агъзур, танк кукI­варайдав 100 агъзур, миллетбазар къир­мишайдав 50 агъзур манат агакьзава. Гьукуматдин шабагьриз лайихлу хьайи гьар са аскердиз 5 окладдин кьадарда аваз пулни гузва.

СВО-да галаз-галаз пуд суткада иштиракайдавай кьве юкъуз ял ягъиз жезва. Гьар зур йисалай аскердиз 15 суткадин отпускни гузва. Аскердиз гьар пуд суткадилай гузвай ял ядай кьве югъ отпускдал эхлядай ихтиярни ава.

Ибурулай алава яз, миллетбазрихъ галаз женг чIугвазвай кьегьалрал хирер хьайила, абур госпиталриз аватайла, аскерриз 3 млн манат гузва. Серенжемда бедендиз хасаратвал хьана, набутвал тайинарнавай касдив, группа­дилай аслу яз, гьар вацра 22 908,62, 11 454, 4581 манат агакьда.

РикIел хкин: махсус серенжемда иш­тиракзавай ксариз банкарихъ, налогрихъ галаз алакъалу кьезилвилер ава. Медицинадин рекьяй къуллугъ авунин, кьилин образование къачунин, кIвалахал кьабулунин, кIвал эцигдай чилин участок къачунин жигьетдайни галайвилер ийизва.

Д. Мустафаева къейд авурвал, СВО-да иштиракзавай вири дагъустан­вийри чпин вилик эцигзавай везифаяр­ викIегьвилелди, жуьрэтлувилелди тамамарзава. Агъзурралди дагъустанвийри миллетбазрихъ галаз женг чIуг­вазва, абуру кьунвай мулкар, хуьрер ва инсанар азадзава.

Чи мурад дяведин серенжем куьтягь хьун, чи кьегьалар сагъ-сала­матдиз чпин кIвалериз хтун я.

Хийир  Эмиров