15-сентябрдиз, Дагъустандин халкьа­рин садвилин суварин юкъуз,­ Кас­пийск шегьерда А. Алиеван тIварцIихъ­ галай спортдинни жегьилрин имарат­да, международный бандитар кукIва­райдалай инихъ 25 йис тамам хьуниз ва Садвилин йикъаз талукьарнавай шадвилин гегьенш мярекат кьиле фена. Ана РФ-дин Президентдин Администрациядин регьбердин замес­титель Мегьамедсалам Мегьамедова, Кеферпатан Кавказдин Федеральный округда РФ-дин Президентдин векил Юрий Чайкади, Дагъустан Рес­публикадин Кьил Сергей Меликова, Россиядин игитри, Госдумадин ва РД-дин Халкьдин Собранидин депутатри, ополченцийри, СВО-дин иштиракчийри ва абурун хизанри, диндин, жегьилрин тешкилатрин векилри иштиракна. 

Мегьамедсалам Мегьамедова, кIватI хьанвайбуруз сувар тебрик авуналди, 14 йис идалай вилик кьиле фейи вакъи­ани рикIел хкана: «2010-йисуз гьа и имаратда Дагъустандин халкьарин III съезд кьиле фенай ва вирида терроризм кье­тIивилелди негь авунай, дагъустанвийри Россиядин къурулушдик кваз виликди фидайдакай малумарнай. Чи республикадиз гьахьай международный­ террористар кукIварайдалай инихъ 25 йис тамам хьуниз талукьарнавай суварин мярекатда квехъ галаз санал ишти­ракунал зун пара шад я. Са рахунни алач, террорист­рин винел гъалибвал къачун — им гзаф халкьарикай ибарат Да­гъустандин ва гьакI Россиядин тарихда игитвилин нурлу вакъиа я. Россиядин армиядини чи халкьди гьакъикъи садвал къалурна ва душман кукIварни авуна».

Вичин рахунрилай гуьгъуьниз М. Мегьамедова Россиядин Президент Владимир Путина ракъурнавай тебрикдин чар кIелна. Ана ихьтин гафар авай: «Международный террористар кукIварунин кардик дагъустанвийри кутур паюнал чна рикIин сидкьидай дамахзава. Абуру къени дяведин махус серенжемда игитвилер къалурзава. Зун инанмиш я, асирралди чи халкьарин арада авай несилрилай несилрал агакьарзавай дуствал, сад-садан гъавурда акьун чи гъалибвилерин замин жеда. Чна вирида санал Ватандин азадвал, абадвал патал ийизвай лайихлу крар артухарда».

Дагъустанвийриз халкьарин садвилин югъни юбилей Юрий Чайкадини теб­рикна.

— 1999-йисан сентябрь чи алай аямдин тарихда лап муракаб девиррикай сад хьана, — къейдна Ю. Чайкади. — Эгер Басаеван, Хаттабан дестейриз Дагъус­танда чпин чIуру ниятар кьилиз акъуддай мумкинвал хьанайтIа, сифте нубатда Кеферпатан Кавказда ва ахпа вири уьлкведани лап еке месэлаяр арадал къведай. Гьа чIавуз Россиядин мягькемвал ахтармишай хьтинди я. Чи уьлкведин гьакъикъи регьбер Владимир Влади­мирович Путинан регьбервилик кваз да­гъустанвийри, Россиядин армияди вири четинвилериз дурум гана ва бандитар кукIварна, уьлкведин садвал хвена.

Дагъустанвийри жуьреба-жуьре девирра къалурай викIегьвилер, терроризмдихъ, миллетбазрихъ галаз женгер чIугур ва викIегьвилелди телеф хьайи инсанар, Дагъларин уьлкве кIеве тур вакъиаяр рикIел хкуналди, РД-дин Кьил Сергей Меликова лагьана:

— Гьуьрметлу юлдашар! Къе чна Да­гъустандин халкьарин садвилин юкъуз чи чилел атай международный террористар кукIварайдалай инихъ 25 йис тамам хьун къейд авунихъ еке метлеб ава. Чи тарихда душмандин хуруз вири халкьар тупламиш хьана къарагъна, гъалибвал къазанмишай вакъиаяр, дуьшуьшар садни кьвед туш. Жуван чил, халкь кIан хьуни, вафалувили дагъустанвийрин руьгь мягькемарзавай, абур игитвилер авуниз мажбурзавай. Женгиниз вири халкь къарагъайла, гъалибвални къазанмишда.

Дагъустанвийрихъ галаз гуьруьш­миш хьайила, чи Президентди къейд аву­­най: «Государстводин регьбердиз къу­­ват­ни жуьрэтлувал инсанри гузвайди я. Гьа вахтунда заз хайи Ватан хуьн патал чпин чанар къурбанд ийиз гьазур инсанар акун лап важиблу тир. Гьа йикъа­лай зун агъуна: чун садрани магълуб жедач». Владимир Владимирович гьахълу я: Ватан кIани халкь далудихъ галамай кьван са чапхунчидивайни, душмандивайни Россия муьтIуьгъариз жедач. Гъалибвал анжах чи пата жеда.

Сергей Меликова 1999-йисуз международный террористрин хура уьтквемвилелди акъвазай Амучи Агьмедханован, Сиражудин Исмаилован, Ирина Янинадин, Мака Къурбанован, Эрзиман Муслимован ва къе дяведин махсус серенжемда игитвилелди иштиракзавай абурун багърийрин (Евгений Янинан, Заурбег Агьмедханован, Сабир Исмаилован, Жабраил Къурбанован, Азим Муслимован ва Россиядин Игит Муслим Муслимован) тIварар кьуна.

Дагъустанвийриз кьве сувар Россиядин Игитрин Ассоциациядин Президент, генерал-полковник Владимир Шаманова, Дагъустан Республикадин сад лагьай президент Муху Алиева, Нижний Новгороддин­ областдин патай сенатор Александр Вайнберга ва масабуру тебрикна.

Хийир  Эмиров