Жегьил пешекар — кьилин духтур

Чна виликдайни къейд авурвал, чи гзаф жегьил­ри Урусатдин жуьреба-жуьре шегьерра чпин алакьунар, пешекарвилин виниз тир ерияр къалурзава, жавабдар къуллугърал гьакъисагъвилелди кIвалах­зава. Красноярскда яшамиш жезвай ва ана медицинадин чIехи центрадин кьилин духтурвиле кIвалахзавай  Ренат  Бадрудинович  Къурбанисмаиловни  чIехи алакьунар авай жегьил пешекар я.

Ам 1991-йисан 31-октябрдиз  Мегьарамдхуьруьн райондин Гилийрин хуьре дидедиз хьана. Диде-бубадихъ галаз Красноярскдиз куьч хьайи чIавуз Ренатан кьуд йис тир. Сибирдин меркез яз гьисабзавай Красноярскда Рената мектеб агалкьунралди куьтягьна. Мектебда ада вири жуьредин мярекатра активнидаказ иштиракдай. 2008-йисуз Красноярскдин ме­дицинадин университетдин сагъардай факультетдик экечIна. Низамлувални савадлувал къалурай жегьил, 3-курсуниз акъатайла, факультетдин студентрин советдин председателвиле тайинарна. Са йисан вахтунда и кIвалахда вичин алакьунар къалурай Ренатакай гуьгъуьнлай вири вуздин студентрин советдин председатель хьана. ИкI, ам университетдин алимрин советдик квай анжах тек студент тир. Студентвилин йисара ада “Тади куьмекда” духтурвиле ва массажиствиле кIвалахна.

2015-йисуз университет куьтягьна ва шегьердин 4-нумрадин азарханада духтур-хирургвиле, акушер-гинекологвиле кIвалахал акъвазна.  Ренат вичин пешедиз ри­­кIивай вафалу, чирвилер, тежри­ба артухарунихъ ялзавай же­гьил пешекар я. Гьа ихьтин ерийри къуллугъдин жигьетдай виликди финизни хъсан таъсирзава. 2017-йисуз чи ватанэгьли азарханадин йи­къан стационардин отделенидин заведующийвиле тайинарна. 2018-йисалай Красноярскда авай гзаф хилерикай ибарат медицинадин чIехи Лорри центрадин кьилин духтурвиле кIва­лахзава.

Малум хьайивал, Красноярскдин крайда Ренат Къурбанисмаилов кьилин духтуррикай виридалайни жегьилди я. Духтурдихъ агал­кьунар гзаф ава. 2013-йисуз ада бизнесдин проектрин рекьяй Россиядин “Enactus”, про­фессор В.Сологубан тIвару­нихъ галай, студентрин ва жегьил­ алимрин “Здравоохраненидин жегьил тешкилатчи” конкурсра 1-чкаяр кьуна. 2015-йисуз адакай Красноярскдин Кировский райондин администрациядин руководителди тешкилай “Бажарагълувал” премиядин гъалибчи хьана.

2017-йисуз Россиядин илимрин академиядин Сибирдин отделенидин Красноярскдин илимдин центрада ординатурада кIел­на. Гьа и йисуз ада профсоюздин жегьил регьбердин школа куьтягьна ва диплом къачуна. 2018-йисуз Ренат Къурбанисмаилов Россия­дин лап хъсан гинекологрикай сад яз гьисабна. Илимдин журналра ада вичин пешедин ре­кьяй важиблу макъалаярни чапнава. Алай йисан гатуз ада аспирантура­ куьтягьда ва диссертация хуьда.

ЦIи ада “Россиядин регьберар” машгьур конкурсда иштиракна ва виридалайни гзаф баллар къазанмишуналди гъалиб хьана. Къейдна кIанда хьи, и конкурсдиз 10 агъзурдалай гзаф пешекарри арзаяр ракъурнавай. Абурун жергеда здравоохраненидин хиле кIва­лахзавай тежрибалу духтурар, регионрин министрар, азарханайрин, клиникайрин кьилин духтурар, абурун заместителар, заведующияр авай. Конкурс­диз Президент В.Путинани кье­тIен фи­кир гузва. Гъалиб хьайи Ре­­нат Бадрудиновичаз 1 милли­он­ манат пул гана. И такьатар адаз гележегда вичин образование мадни виниз хкажунин рекье серфдай мумкинвал ава.

Жегьил духтурдин хизанда йис­ни зур хьанвай бицIек чIехи жезва. Гележегдин фикиррикай ихтилат кватайла, Ренат Къурбанисмаилова вичиз Дагъустандиз хкведай ва пешедин рекьяй идара ийи­дай кьилин къуллугъдал акъваздай ниятар авайдакай лагьана. Къуй чи бажарагълу пешекардин мурадар кьилиз акъатрай, ам мадни кьакьан дережайрив агакьрай!

К. Ферзалиев


Всего просмотров: 225
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире