(Эвел — 2024-йисан 14-нумрада)

Къуръан кпIунал кIелунин лайихлувилер

КпIунал Къуръан кIелзавайдаз Пай­гъам­барди (Аллагьдин салават ва салам хьуй вичиз) зурба муштулухдалди шад хабар ганва. Гьадисда лагьанва (мана): «КIан яни квекай садаз, вичин хизандин патав хтайла, анал пуд зурба, куьк, чпихъ бала (шараг) галай девеяр жагъун?! Чна лагьана: «Эхь»! Ада лагьана: «Квекай сада вичин кпIунал кIелдай пуд аят, адаз мадни хийирлу я пуд зурба, куьк, чпихъ бала (шараг) галай девейрилай».

Маса гьадисда лагьанва (мана): «Ни йифен кпIарал цIуд аят кIе­лай­тIа, а кас кхьидач (кутадач) гъа­фил­бурун­ жергейрик (къайгъусузди, ягъалмишди)­ ва ни кIелайтIа йифиз кпIунал виш аят, ам кхьида (гьисабда) «къанитин­рикай» (итIаатлубурукай) яз ва ни кIе­лайтIа йифиз кпIунал агъзур аят — ам кхьида (гьисабда) «му­къан­тIи­­рин­рикай» яз (чпиз Аллагьди чIехи сувабар гайибурукай)!» (Албаний, «Сагьигь-Жа́мигI»).

Пайгъамбарди (Аллагьдин салават ва салам хьуй вичиз) мад са гьадисда лагьанва (мана):

«Аллагьдин КIвалерикай (мискIин­рикай) гьар гьи КIвале инсанар кIватI хьайитIани, — Къуръан кIелун ва ам масабуруз чирун патал — Аллагьди абур Вичин регьимдалди элкъуьрна кьазва, абурун патав малаикар эвичIзава ва Аллагьди а инсанрин тIварар малаикрин арада кьазва» (Муслим).

Ямин  Мегьамедов, диндин алим