Саласа юкъуз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз «Дагъустандин муниципалитетрин Совет» Ассоциациядин правленидин заседание кьиле фена. Ана РД-дин Кьилин ва Гьукуматдин Администрациядин регьбер Алексей Гьасанова, шегьерринни районрин кьилери, чкадин самоуправленидин органрин, жемиятдин тешкилатрин векилри иштиракна.
Мярекатдин эвел кьиляй республикадин премьер-министрди Дагъустандин Кьил Сергей Меликован патай виридаз 21-апрелдиз къейд авур Чкадин самоуправленидин югъ мубаракна, виридахъ агалкьунар хьун алхишна.
«Гьар юкъуз агьалийрихъ галаз сих алакъада аваз, гьукумдин къурулушрин куьмекдалди, куьне республикадин шегьеррани районра яшайишдин кар алай месэлаяр гьялзава. Шад жедай кар я, РФ-дин Президент Владимир Путинан Указдалди, Ботлих, Сергокъала, Хасавюрт ва ЧIарода районриз кьилериз «Россиядин Федерациядин чкадин самоуправленидин лайихлу къуллугъчи» лагьай гьуьрметдин тIварар ганва. Им куь гьар йикъан зегьметдиз вини дережада аваз ганвай къимет я. Мубаракрай!», — лагьана А. Абдулмуслимова.
Муниципалитетрин кьилерин кIвалахдин менфятлувиликай рахадайла ада къейд авурвал, гьар юкъуз чкадин самоуправленидин органрин кIвалахдин гьакъиндай ахтармишунар кьиле тухузва. ЦIинин йисалай и кIвалах цIийи къайдада тешкилдайвал я. Алай вахтунда Дагъустанда шегьерринни районрин кьилерин кIвалахдиз къимет гудай махсус рейтинг арадал гъанва. Адан куьмекдалди гьина кIвалах зайиф ятIа ва гьина вилик физватIа, гьа кар тайинарда.
Заседанидин сергьятра аваз жуьреба-жуьре месэлайрин гьакъиндай чпин фикирар Алексей Гьасанова, Ассоциациядин председатель, Къайтагъ райондин кьил Алим Темирбулатова, Табасаран райондин кьил Мегьамед Къурбанова ва масабуру лагьана.
ГьакIни мярекатдал кIвалахдин жигьетдай тафаватлу хьайи шегьерринни районрин администрацийрин 40 векилдив государстводин шабагьарни вахкана. Абурукай 16 кас — «РД-дин муниципальный къуллугъдин лайиху работник» лагьай тIварцIиз, 2 кас — «Гьакъисагъ зегьметдай» медалдиз, 4 кас Дагъустан Республикадин Гьуьрметдин Грамотадиз лайихлу хьанва.
Агьмед Магьмудов
