Къуръан — мусурманрин пак ктаб! Гъилер чуьхуьн гвачиз адак гьатта хкIадай ихтиярни авач. Гьакъикъатда, им дуьньяда виридалайни гзаф чапнавай (4 миллиондив агакьна), виридалайни маналу, сирлу ва гьа са вахтунда виридалайни гзаф кIелзавай ктаб я. Диндин маса каламрилай тафаватлу яз, Аллагь-Таалади Къуръан Къияматдин йикъалди са дегишвални авачиз хуьзва.
Къуръан цIарба-цIар, гьар са гаф таржума ийиз жедач. Маса чIалариз Къуръандин аятрин анжах манайринни баянрин (смысловой) таржума ийиз хьун мумкин я. И месэладив эгечIзавай касни кьве чIални (араб ва таржума ийизвай) лап хъсандиз чизвай, диндин рекьяй дерин чирвилер авай алим хьун герек я. Лезгийрикай пак Къуръандин аятрин манайрин таржума сифте яз араб чIалай лезги чIалаз диндин алим, луткунви Ямин Амрагьович Мегьамедова авунва. Къуй вичелай Аллагь рази хьурай! Жавабдар и кIвалах ада дуьм-дуьз 10 йисуз кьиле тухвана.
Къейд ийин, «Пак Къуръандин манайрин таржума – лезги чIалал» ктабдин кьуд лагьай издание шаз Москвада чапдай акъудна. И изданидиз РФ-дин мусурманрин Духовный управленидин, Урусатдин муфтийрин Советдин, Урусатдин Азиядин паюнин мусурманрин Духовный управленидин ва Дагъустандин Муфтиятдин пешекаррин патай разивилин къимет ганва. 2022-йисуз и ктаб гьакIни Мединада Къуръанар акъудзавай Фахд пачагьдин тIварунихъ галай комплексдани 10 агъзур экземпляр аваз чапнава.
16-апрелдиз Ахцегь райондин Медениятдин кIвале «Пак Къуръан ва адан манайрин таржума — лезги чIалал» ктабдин презентация кьиле фена. Ам муниципалитетдин ва РД-дин милли сиясатдин ва динрин крарин рекьяй министерстводин куьмекдалди А.Гьасанан тIварцIихъ галай медениятдинни марифатдин центради тешкилнавай. Мярекатда диндин алимри, яшайишдин жуьреба-жуьре хилерин, Ахцегь, Докъузпара, Мегьарамдхуьруьн, СтIал Сулейманан районрин администрацийрин векилри иштиракна.
Межлис тIвар кьунвай центрадин директор, «Лезги газетдин» кьилин редактор Мегьамед Ибрагьимова тухвана ва вичин сифте гафунилай кьулухъ Къуръандин пак аятар кIелун патал ада гаф Абдуллагь Мегьамедоваз гана.
Гуьгъуьнлай мярекатдин иштиракчийрин вилик РД-дин милли сиясатдин ва динрин крарин рекьяй министерстводин управленидин кьил Мугьаммад Халилов рахана. Вичин ихтилатрилай кьулухъ ада РД-дин милли сиясатдин ва динрин крарин рекьяй министр Энрик Муслимован къарардалди, Дагъустандин халкьарин арада садвал ва разивал мягькемарунин кардик, дин вилик тухуник лайихлу пай кутунай алим Ямин Мегьамедоваз министерстводин гьуьрметдин махсус лишан ганвайди къейдна ва шад гьалара шабагь Къуръандин аятрин манайрин таржумачидив вахкана.
Ахцегь райондин администрациядин патай Ямин Мегьамедован тIварцIихъ ва атанвай мугьманриз тебрикдин хуш келимаяр муниципалитетдин кьилин заместитель Роберт Гьамзаева лагьана.
Мярекатдин сергьятра аваз Кьиблепатан Дагъустанда РД-дин Муфтиятдин векил, ахцегьви Гьуьсейн Гьажиев, Ахцегь райондин имамрин Советдин председатель ва Ахцегьрин жуьмя-мискIиндин имам Абдулашим Абдулгьашумов, Мегьарамдхуьруьн райондин Общественный палатадин председатель Агъадаш Нагъметуллаев, Мегьарамдхуьруьн райондин Советский хуьруьн мискIиндин имам Сулейман Пашаев, Махачкъаладин Хушет посёлокдин имам аш-Шафиидин тIварцIихъ галай мискIиндин имам Жейгьун Агьмедов, агъсакъалар тир хуьруьгви Шагьбан буба ва луткунви Байрам буба рахана. Абуру чи бубайрин тарихдай вакъиаяр рикIел хкиз къейд авурвал, лезгияр Кавказдин халкьарикай сифте яз Ислам дин кьабулай халкь я. Алай вахтунин несилдини, чпин баркаллу бубайрин хъсан адетриз вафалувал къалуруналди ва ирс хуьналди, диндин рехъ лайихлудаказ давамарзава.
Мярекатдин эхирдай гаф Ямин Мегьамедоваз гана. Ада вичин рахунра Къуръандин аятрин манаяр таржума авун патал кьиле тухвай кIвалахдикай, таржума ийидай ихтияр гузвай шартIарикай суьгьбетна ва презентация тешкилунин карда куьмекар гайи вирибуруз сагърай лагьана.
Къейд ийин хьи, А.Гьасанан тIварцIихъ галай центради Ахцегь райондин вири мектебриз «Пак Къуръан ва адан манайрин таржума — лезги чIалал» ктаб пишкешна.
Дашдемир Шерифалиев
