Дагъустанда Белгороддин областдай атанвай аялри культурадин ирсинин имаратриз талукь яз чIугунвай шикилрин выставка ачухна. Экспозициядиз региондин Гьукуматдин Председатель Абдулмуслим Абдулмуслимов килигна.
«Махачкъалада, Милли библиотекада, памятникар ва тарихдин чкаяр хуьнин международный югъ сувар хьиз къейд авунин сергьятра аваз аялрин шикилрин аукцион кьиле физва. Шикилрай Дагъустандин архитектурадин памятникар, тарихдин метлеб авай имаратар, чкаяр аквазва», — малумарна региондин гьукуматдин пресс-къуллугъди.
Къейд ийизвайвал, аукциондал къазанмишай такьатар Белгороддин агьалийриз рекье твада.
«Эгер Белгороддин областдай атанвай аялри къе чи республикадихъ галаз алакъа авай чкайрин шикилар чIугвазватIа, абуру чпин фикирар гьа шикилра къалурзаватIа, ида аялрин рикIе Россиядин Федерациядиз ва гьар са региондиз авай кIанивилин гьиссер къалурзава. И мярекатда иштиракзавай виридаз за сагърай лугьузва. Чи республика мугьманар хушдиз кьабулуналди, кIеве гьатайбуруз куьмек гуналди машгьур хьанвайди я. Чна умуд кутазва хьи, мугьманвилиз атанвай аялар дагъустанвийри чеб кьабулнавай гьалдал рази яз амукьда. Инанмиш я, инлай кьулухъни абур Дагъустандиз къведа, абуруз ина юлдашар, дустар жеда», — лагьана иштиракчийрин вилик рахадайла Абдулмуслим Абдулмуслимова.
Алай вахтунда Дагъустанда Белгороддин областдай атанвай 500-лай виниз аялри ял язава, кIелзава.
«Лезги газет»
