Алатай гьафтеда «Дагъустан» РИА-дин майдандал республикадин СМИ-рин векилар РД-дин Государстводин яшайишдин кIвалерин инспекциядин кьил Сергей Касьяновахъ галаз гуьруьш хьана. Мярекатдал веревирд авур асул месэла Вирироссиядин «Хсусиятчидин югъ» проект уьмуьрдиз кечирмишзавай гьалдиз талукь тир.
И проект 2024-йисан 13-апрелдилай 13-июндалди РФ-дин вири регионра кьиле тухузва. И девирда гзаф квартирайрикай ибарат кIвалер идара ийизвай компанийри ихьтин кIвалерин хсусиятчийрин умуми собранияр тухузва ва йисан вахтунда кIвалера тамамарнавай кIвалахрин гьахъ-гьисабар ийизва. ГьакIни и карда абуру ГИС ЖКХ приложенидин куьмекдалди онлайн-къайдада сесерни гузва.
Идарадин кьили хабар гайивал, Дагъустанда «Хсусиятчидин югъ» проект уьмуьрдиз кечирмишиз им 10 лагьай йис я.
«Проектдин макьсад ам я хьи, гзаф квартирайрикай ибарат кIвалера яшамиш жезвай ксаривай (иесийривай) вилик эцигнавай месэлайрихъ галаз таниш жез, и ва я маса материалар ахтармишиз ва «Госуслуги. Дом» приложенида ва я ГИС ЖКХ приложенидин «Хсуси кабинетда» чпиз къулай вахтунда сесер гуз жезва», — лагьана Касьянова.
Квартирайрин иесийрин умуми собранийра агьалийриз кIвал идара авуниз талукь гьар жуьредин месэлаяр къарагъардай, гьа гьисабдай яз идара ийизвай компанияди (УК) тамамарзавай кIвалахриз талукь гьахъ-гьисабар веревирд ийидай мумкинвал жезва. РикIел хкин, УК-ри кIвалерин иесийрив талукь тир делилар, малуматар 1-кварталдин эхирдалди агакьарун лазим я.
«Кар ана ава хьи, кIвалерин хсусиятчияр вири санал кIватIун ва я абурувай ацIурнавай бюллетенар къачун регьят кар туш — и себеб аваз кIвализ талукь тир бязи къарарар кьабулиз жезвач», — гъавурда туна кьилин инспекторди.
Ада кьетIендаказ хабар гайивал, алай вахтунда уьлкведа онлайн-къайдада кьиле тухузвай собранийрин кьадар гзаф жезва. Месела, эгер 2020-йисуз и къайдада анжах 129 собрание кьиле тухванайтIа, 2023-йисан зулалди абурун кьадар 58 агъзурдав агакьнавай.
«Гзаф квартирайрикай ибарат кIвалерин фонд Дагъустанда къенин юкъуз 4 815 кIвализ барабар я. Абурукай анжах 3 процент хсусиятчийривай умуми собрание кьиле тухуз хьанва», — лагьана ада.
Касьянова къейд авурвал, гзаф квартирайрикай ибарат кIвалера яшамиш жезвай агьалийривай (хсусиятчийривай) умуми собранийрал компаниядивай йисан гьахъ-гьисаб истемишиз, идара ийидай маса къайда хкягъиз, ремонтрин кIвалахар тамамарун патал кIватIзавай гьакъидин кьадар тайинариз ва, гьелбетда, алукьзавай сезондин вахтунда кIвал къулайдаказ ишлемишун патал авуна кIанзавай кIвалахрин план тестикьариз жезва.
Пресс-конференциядин нетижаяр кьуналди Сергей Касьянова хабар гайивал, мукьвара РД-дин Госжилинспекцияди общественникрин, пешекаррин, идара ийизвай компанийрин векилрин иштираквал авай гуьруьш кьиле тухвана ва абурухъ галаз санал, стратегиядин сессиядин къайдада, УК-ри тамамарзавай къуллугърин еридиз талукь рейтинг туькIуьрунин бинеда гьатдай важиблу месэлаяр веревирдна.
«И рейтинг пайда хьайила гьар са агьалидивай вичин идара ийизвай компаниядиз лайихлу къимет гуз, ам масабурув гекъигиз, хийирлу нетижаяр хкудиз ва, санлай къачурла, гзаф квартирайрикай ибарат кIвалер идара авунин къайда, ери хъсанарунин рекье камар къачуз жеда», — лагьана ада.
Эхирдай С.Касьянова кIвалин умуми эменнидиз, гзаф квартирайрикай ибарат кIвалерин патарив гвай мулкариз талукь яз журналистри гайи суалриз жавабар гана. Къейд ийин, «Хсусиятчидин югъ» кьиле тухуниз талукь умуми малуматар, делилар, агьалийрин къулайвал патал, РД-дин Госжилинспекциядин сайтда чапнава.
Жасмина Саидова
