14-апрель гьяд югъ тиртIани, Лезги театрдин дараматдин ракIар ачух тир: и юкъуз ина Кьиблепатан Дагъустандин муниципалитетрин мектебра вири вадар аваз кIелзавай аялрин Слет кьиле фена.
Театрдин фойеда Дербент шегьердин образованидин идарайри, Махачкъаладин дизайндин ва информациядин технологийрин колледжди, маса тешкилатри, кьилдин ксари мярекатдин мугьманар, иштиракчияр патал лезги халкьдин тарихдиз, медениятдиз, адетриз, тIебиатдиз талукь выставкаяр тешкилнавай.
Мисал яз, «Кьиблепатан Дагъустан» лишандик кваз гьевескар эколог, сиягьатчи, шикилчи Юсиф Саркарован шикилрин выставкади гьар садан фикир вичел желбзавай. Абурай Лезгистандин хуьрерин яшайиш, иер тIебиат, надир архитектурадин имаратар аквазвай. Выставкадиз килигзавайбуруз гуя чпи гьа чкайра сиягьатзавайди хьиз авай. Лезгийрин машгьур регьбер Гьажи Давуд Муьшкуьрвидикай Ширвандин хан хьайидалай инихъ 300 йис тамам хьуниз талукьарна Гь.Давудан тIварцIихъ галай руьгьдинни марифатдин центради гьазурнавай художник Мелик Агъабалаеван суьретрин выставкани тариф авуниз лайихлуди тир…
Вири вадар аваз кIелзавай аялрин Слет жемиятдинни сиясатдин машгьур деятель Мамед Абасован куьмекдалди Кьиблепатан Дагъустандин жегьилрин Союзди тешкилнавай. Ана РД-дин Халкьдин Собранидин депутатри, шегьерринни районрин кьилери, жемиятдин, сиясатдин, илимдин векилри, спортсменри, муаллимри ва масабуру иштиракна. Слетдин асул макьсад мектебра кIелзавай аялрин арадай дерин чирвилер авайбур винел акъудун, абуруз чпихъ авай алакьунар вилик тухуз куьмекун ва абурук руьгь кутун тир.
Мярекат, иштиракчияр тебрик авуналди, Мамед Абасова ачухна. Ада образованидин хиле кьиле физвай гьар са мярекатдихъ еке метлеб авайди ва алакьунар авай жегьилриз вилик финин рекье куьмекар гунилай тайин дережада республикадин гележегни аслу тирди къейдна.
Гуьгъуьнлай иштиракчийрихъ элкъвена саламдин келимаяр Кьиблепатан Дагъустандин жегьилрин Союздин регьбер Равидин Абдурагьимова лагьана. Ада хъсандиз кIелзавай аялрихъ мектебар акьалтIарайдалай кьулухъни еке агалкьунар хьун алхишна ва абурухъ дерин чирвилер хьунин карда муаллимрин зегьметди кьетIен чка кьазвайди къейдна.
Слетдал гьакIни РД-дин Халкьдин Собранидин Председателдин сад лагьай заместитель Юрий Левицкий, РД-дин милли сиясатдин ва динрин крарин рекьяй министр Энрик Муслимов, ФЛНКА-дин президент Васиф Гьасанов, Дербент райондин кьил Мавсум Рагьимов, РЦО-дин директор Анжела Байрамбегова ва хейлин масабур рахана. Абурун гафарай малум хьайивал, эхиримжи йисара республикада образованидин хиле хъсан патахъ хейлин дегишвилер кьиле физва. Кьилди къачуртIа, цIийи мектебар, аялрин бахчаяр эцигзава, куьгьне хьанвай дараматар цIийикIа туькIуьр хъийизва, хъсандиз кIелзавай, жуьреба-жуьре конкурсра гъалиб жезвай школьникриз, студентриз махсус стипендияр, премияр гузва, муаллимрин пешекарвал артухарун патал хейлин серенжемар кьабулзава. Абурун гафаралди, ибур вири Дагъустандин Кьил Сергей Меликова кьиле тухузвай сиясатдин бегьерар я.
Къейд ийин хьи, Слетдин сергьятра аваз Агъул, Ахцегь, Дербент, Докъузпара, Кьурагь, Мегьарамдхуьруьн, Рутул, СтIал Сулейманан, Табасаран, Хив районрин, Дербент ва Дагъустандин Огни шегьеррин мектебра вири вадар аваз кIелзавай 70-далай виниз аялриз (гьар садаз) Кьиблепатан Дагъустандин жегьилрин Союздин ва РД-дин образованидин ва илимдин министерстводин патай гьуьрметдин грамотаярни 15 агъзур манатдин кьадарда аваз пулдин пишкешар гана. Шабагьар абурув Юрий Левицкийди, Энрик Муслимова, Васиф Гьасанова, Мамед Абасова, Равидин Абдурагьимова, Мавсум Рагьимова, Дербент шегьердин кьилин заместитель Видади Зейналова, Табасаран райондин кьил Мегьамед Къурбанова, «Лезги газетдин» кьилин редактор, Урусатдин журналистрин Союздин Дагъустандин отделенидин председатель Мегьамед Ибрагьимова, РД-дин Общественный палатадин член Индира Юнусовади ва масабуру вахкана.
ГьакIни мярекатдал са жерге муаллимарни тешкилатчийрин патай багьа савкьатриз лайихлу хьана. Абурун арада СтIал Сулейманан райондин ЦIийихуьруьн юкьван мектебдин муаллим Тельман Гъаниев, Дербент шегьердин 11-нумрадин мектебда табасаран чIалан тарсар гузвай ва Рутул райондин Мишлешрин хуьруьн мектебда цIахур чIалан тарсар гузвай муаллимар авай. Абуруз пишкешар яз телевизорар гана.
Слетдин эхирдай вири вадар аваз кIелзавай аялрин арада «Кьиблепатан Дагъустандин медениятдин ирс» лишандик кваз махсус викторина кьиле тухвана. Аялри чпихъ Кьиблепатан Дагъустандин халкьарин тарихдай гьихьтин чирвилер аватIа ахтармишна. Викторинада Табасаран райондин команда виридалайни викIегь хьана. Гъалибчияр алава пулдин пишкешризни маса савкьатриз лайихлу хьана.
Агьмед Магьмудов
