З.А.Мамедов рагьметдиз фена

Алай йисан 3-апрелдиз къурушвийрив саки 60 йисуз аптекарвиле кIвалахай Россиядин фармацевтрин илимрин обще­ст­­водин член, кьилин дережа авай провизор-тешкилатчи Зейнал Авчиевич Мамедов кечмиш хьана лагьай чIулав хабар агакьна.

З.А.Мамедов 1936-йисан      10-августдиз Ахцегь райондин Игъир­рин хуьре дуьньядал атана. Ада сифтегьан 3 класс хайи хуьре, 6-класс Ахцегьа, 7-класс ЦIийи Къурушдал куьтягьна. Гуь­гъуьнлай ам Махачкъаладин мед­училищедин фармацевтический отделенидик экечI­на. 1963-йисуз училище яру дип­лом­далди куьтягьай З.Мамедов Да­гъустандин аптекайрин Управлениди Къизляр шегьердин 34-нумрадин аптекадин заве­дующийвилиз, анайни Брянск поселокдин 63-нумрадин апте­кадиз рекье твазва. Пуд йисуз Зейнал Авчиевича Кочубейдани кIва­лахна.

1966-йисуз Къурушдал аптекадин цIийи дарамат эцигайла, ам жемятдин тIалабуналди ина 62-нумрадин аптекадин кьиле акъвазна. Жегьил пешекар Зейнал духтурди (адаз хуьре вирида гьуьрметдин лишан яз Зейнал духтур лугьудай) гьелелиг вич мурадрин кукIушрив агакь тавунвайди гьиссзавай, гьавиляй ам Пятигорскдин фармацевтический институтдик экечI хъувуна ва 1975-йисуз анаг заочнидаказ акьалтIарна.

11 йисуз хуьруьн жемятдин сагъламвилин къаравулда акъва­зай Зейнал Авчиевич аптекайрин Управленидин къарардалди Хасавюрт шегьердин 6-нумрадин кьилин аптекадин заведующийвиле тайинарна. Зейнал Авчиевич вичел ихтибарнавай везифайрив намуслувилелди эгечI­на. Ада республикадин аптекайрин къуллугъчийрихъ галаз семинарар тухвана, Киевда, Казанда, Пятигорскда, Махач­къа­лада чирвилер хкаждай курсара кIел хъувуна.

З.Мамедов Россиядин фармацевтрин илимрин обществодин  член, кьилин дережа авай провизор-тешкилатчи тир. Зейнал духтурдин шикил хейлин йи­­­­сара аптекайрин Управле­нидин Гьуьрметдин доскада хьана. Ам Управленидин патай гьуьр­метдин грамотайриз, чухсагъулдин чарариз, пулдин премийриз лайихлу хьана. З.Ма­медов В.И.Ленинан юбилейдин, “Зегьметдин ветеран” медалрин ва “Соцсоревнованидин гъалибчи” кьве знакдин сагьиб тир.

Виринра гьуьрметни авторитет къазанмишай Зейнал духтур чешнелу хизандин кьил тир.

Къурушрин хуьруьн жемятди,  Зейнал Авчиевич Мамедов кечмиш хьунихъ галаз алакъалу яз, адан хизандиз, мукьва-кьилийриз, ярар-дус­­тариз, дериндай гъам чIугу­налди, башсагълугъвал гузва. Адан экуь къамат яргъалди чи рикIера амукьда.


Всего просмотров: 51

Читайте также: