8-апрелдиз чи арадай зегьметдин ва уьлкведин Яракьлу къуватрин ветеран, яргъал йисара Кьиблепатан Дагъустандин районра гьакъисагъвилелди военный комиссарвиле къуллугъай подполковник, камаллу насигьатчи Мегьамедов Гьажиагъа Ибрагьимович акъатна.
Ам 1932-йисан 14-майдиз Ахцегьа къуллугъчидин зегьметкеш чIехи хизанда дидедиз хьана. Девир четинди тир. КIвачи чил кьурвалди кIелунихъ галаз санал колхоздин производствода чешнелудаказ кIвалахзавай жегьил гьакъисагъ, намуслу зегьметдай 1949-йисан 22-сентябрдиз «За доблестный труд» медалдиз лайихлу хьана.
1951-йисуз Ахцегьрин 1-нумрадин юкьван чирвилерин мектеб куьтягьай жегьилдиз армиядин жергейриз эверна. Литвадин Каунас шегьердин инженерно-сапёрный полкуна къуллугъзавай чешнелу дагъви аскер, командованидин теклифдалди Москвадин военно-инженервилин училищедик экечIна. 1955-йисуз анаг агалкьунралди куьтягьай лейтенант Эрменистандин Ленинакан шегьердин 58016-нумрадин частунин сапёррин взводдин командирвиле рекье туна. 1960-йисуз ада Хив райондин военкомдин куьмекчивиле, Табасаран райондин военный комиссарвиле ва 1974-йисан январдилай Ахцегь РВК-дин комиссарвиле къуллугъна.
1962-йисалай компартиядин член, жегьилриз ватанпересвилин тербия гунин карда активнидаказ иштиракзавай Гьажиагъа Ибрагьимович «СССР-дин Яракьлу къуватра яргъал йисарин са рехнени квачир лап хъсан къуллугъдай» III (1962) ва II (1967) лагьай дережайрин медалриз, гьуьрметдин грамотайриз, гьакI юбилейрин шабагьриз лайихлу хьана. Алай вахтунда рагьметлу бубадин рехъ давамаруналди, Ахцегь РВК-дин комиссарвиле подполковникдин чиндаваз адан хва Мегьамедов Рафик Гьажиагъаевича намуслувилелди къуллугъзава.
Чна рагьметлудан уьмуьрдин юлдаш, педагогикадин зегьметдин ветеран Саният Мегьамедшерифовнадиз, рухваяр тир Борисаз, Рафиказ, Тофиказ ва руш Айидадиз, вири багърийриз башсагълугъвал гузва. Гь.И.Мегьамедован экуь къамат чи рикIера амукьда.
Ахцегь райондин администрациядин,
«Лезги газет», «ЦIийи дуьнья» газетрин редакцийрин коллективар
