Ял ядай багъдин цIийи къамат

Къадим Дербент йикъалай-къуз же­гьил­ ва гуьрчег жезвайди шегьердин ял ядай багълара арадал къвезвай дегишвилерайни хъсандиз аквазва. Шегьердин 2000 йисан юбилейдихъ галаз алакъалу яз, Кирован, Революциядин Баркалладин, Советрин Союздин Игит Шамсулла Алиеван тIварарихъ галай ва амай вири ял ядай багълар­ни скверар аваданламишунин, цIийикIа туьх­кIуьр хъувунин нетижада а  чкаяр агьалийри рикI алаз ял язавай маканриз элкъвенва.

Гьа са вахтунда къейдна  кIанда хьи, шегьердин виликан Советский, гилан ­Гьейдар Алиеван тIварунихъ галай куь­чеда авай ял ядай чIехи багъда куьгьне тарар ва кул-кусар атIанатIани, инвесторар жагъун тавуниз килигна, ана ял ядай багъ цIийи хъувунин кIвалахар акъваз хьанвай.

Алатай йисан эхиррилай  ял ядай багъ аваданламишунин кIвалахар башламиш хъувунва. Кьилди къачуртIа, чIехи шаир ва камалэгьли Низами Генжевидин памятник ремонтна, вилик квай майданда ва ам элкъуьрна кьунвай чкада жуьреба-жуьре рангарин ва нехишрин плитаяр тунва, цуьквер ва кьуьд-гад  къацу яз амукьдай кул-кусар цанва. Абуруз яд гун патал цин махсус  турбаярни чIугунва, ракъинин сят эцигнава.

Шегьердин ЖКХ-да чаз малумарайвал, ял ядай багъ цIийикIа туькIуьр хъувун ва анин къамат гуьрчегарун гьа идалди сергьятламиш хьанвач, алай вахтунда эцигунрин ва аваданламишунин серенжемар давам жезва. Видеокамераяр кардик кутунин кIвалахар акьалтIарзава, ял ягъун патал куьсруьяр эцигзава.

Ял ядай багъ цIийи хъувунин пландин бинедаллаз ина (ял ядай багъдиз Низами­ Генжевидин тIвар ганва) спортдин майданар, аялри къугъунардай, концертар гудай­ чкаяр, чайха­на­, зурба фон­тан­, беседкаяр, аялрин яратмишунрин кIвал­ ва хейлин маса къулайвилерни жеда.

Вири и кIвалахар фад ва хъсан ери аваз тамамарун патал шегьердин ад­ми­нистрацияди алава инвесторар жагъур­зава.

Гуьрчег ва авадан жезва

Къадим шегьер вич хьиз, Каспий гьуьлуьн  кьерни (Набережная) йикъалай-къуз гуьрчег ва  авадан жезва. Ина вичин умуми майдан 8,6 гектардиз барабар тир гьуьлуьн кьер ачухайдакай “Лезги газетди” гьеле хабар ганай. Къейдна кIанда хьи, агьалийрин ва шегьердиз  къвезвай мугьманрин, туристрин ял ягъун хийирлудаказ тешкилунин махсус программадин бинедаллаз 2017-йисуз Дербентда генани са цIийивал арадал атана: гьуьлуьн къерех тирвал фенвай Шеболдаеван куьчеда, Кьиблепатан Дагъустанда сад  лагьайди яз, аквапарк эцигна, ишлемишиз вахканва. Ял ягъунин барадай  алай аямдин вири истемишунриз жаваб гузвай цин и комплекс чIехибур ва аялар патал ругуд аттракциондикай, гьуьлуьн це эхъведай гьавизрикай, кафедикай, пляждикай, спортдин майданрикай ва маса къулайвилерикай ибарат я.

Гьуьлуьн кьер безетмишнавай цIийи аквапаркда санлай 500-далайни гзаф инсанривай ял ягъиз жеда. Гьелбетда, аквапаркди къадим шегьердиз туристар желбуник умуд ква. ЦIийи комплексда неинки са Дербентдин, гьакI вири Кьиблепатан Дагъустандин районрин аялривай гатун вахтунда ял ягъиз ва чпин сагъламвал мягькемариз жеда.

Къейд ийин, лап мукьвал йисара Дербентдин гьуьлуьн кьере луьтквейра аваз сейрдай станцияни эцигдайвал я. Алай вахтунда и кар патални гегьенш гьазурвилер аквазва.

Нариман Къарибов


Всего просмотров: 28

Читайте также: