Вертолёт — азарлуйрин къуллугъда

8-октябрдиз Махачкъаладин аэропортуна республикадин санитарный медицинадин игьтияжар патал цIийи  Ми-8АМТ вертолёт ацукьна.  Дагъустандин здравоохраненидин министерстводив ам “Здравоохранение” милли проект  уьмуьрдиз кечирмишунин сергьятра аваз агакьна. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана. 

Вертолёт агакьайвалди, Дагъустан Республикадин Кьил Владимир Васильев ва РД-дин здравоохраненидин министр Жама­лудин Гьажиибрагьимов адаз килигна. Ам акьал­тIай четин гьалда авай ксар махсус идарайриз агакьарунин жигьетдай медицинадин лап тади куьмек гун патал лазим тир вири тадаракралди таъмин я. “Умудлу я, алай аямдин вири истемишунрив кьунвай улакь ишлемишуни сад-кьве уьмуьр къутармишдач. Медицинадин цIийи вертолётдин мумкинвилери четин гьалда авай азарлуяр, лугьудайвал, «къизилдин сятина» къутармишиз алакьунин гиманар (шансы) хейлин артухарда”, — къейдна Владимир Васильева вертолётдиз тамашайдалай кьулухъ.

РД-дин здравоохраненидин министр Жамалудин Гьажиибрагьимован гафаралди, Ми-8АМТ вертолёт виче медицинадин лазим  вири куьмекар гун па­тал герек тирвал тадаракламишнава.

— Гзаф важиблу я хьи, цавай фидай аппаратда кардик квай тадаракри яргъа авай хуьрерин лап четин гьалда авай азарлуяр неин­ки санай-саниз тухуз куьмекда, гьакI­ни вертолётда авай вахтундани абурув медицинадин пешекар куьмек агакьда, яни азарлуди сагъарун патал стационарда башламишнавай серенжемар акъва­зардач, — гъавурдик кутуна министрди. — Гьам чIехибур, гьамни гъвечIи аялар тухун патал лазим вири къулайвилер ава, — алава хъувуна ада.

Кеферпатан Кавказда Дагъустан санитарный авиация вилик тухунин программадай медицинадин вертолёт ахъайнавай сад лагьай ре­гион я. Вертолёт санитарный авиациядин Милли къуллугъдин генеральный ди­ректор Александр Мацука чкадал кьван рекье туна. Адан гафаралди, цавай фидай цIийи аппаратдивай, алава кудайди цун тавуна, яргъал мензилдиз лув гуз жез­ва. Цавун­ гимидин рулдихъ компаниядин пилотар же­да. Гележегда чка­дин лётчикриз чирвилер гун пландик ква. Вертолёт Махачкъаладин аэропортуна акъвазда. Куьмек лазим атай гьар гьи чкада хьайитIани, адавай чилел ацукьиз жеда.

РикIел хкин, Дагъустан цIи санитарный авиация вилик тухунин программада ишти­рак­завай 49 региондин сиягьдик акатнава. И программа, вертолётар ишлемишуналди, сифте нубатда, республикадин яргъа авай районра яшамиш жезвай азарлуяр къутармишунин дуьшуьшрин кьадар ва медицинадин куьмекдин ери, гьа гьисабдай яз, лап фад ва виниз тир технологийрикай менфят къачуналдини, хъсанарунихъ элкъуьрнава. Вертолётдикай менфят къачун патал ийизвай харжияр, асул гьисабдай, санитарный авиация вилик тухунин проектдин сергьятра аваз чара авунвай такьатрикай (85 %), амайбур (15 %) региональный бюджетдин такьатрикай жеда.

«Лезги газет»


Всего просмотров: 42

Читайте также: