Ватан кIан хьухь ва хуьх!

Алатай гьафтеда Ахцегьа, райбиблиоте­кадин залда, райондин 90 йисан юбилейдин мя­рекатрин сергьятра аваз ва “Хайи Ватан кIан хьухь ва хуьх!” лишандик кваз “Ахцегь рай­он: тарихдин 90 йисан рехъ” темадай илимдинни  тежрибадин  конференция  хьана.

Райондин кьиле авай ксарин тапшуругъдалди библиотекадин коллективди тешкилна кьиле тухвай и маналу серенжемда муниципалитетдин кьилин заместитель Алмас Шуаева, агъсакъалрин советдин председатель Къеземет Къеземетова, ветеранрин советдин председатель Нажмудин Гудаева, райондин общественный палатадин председатель  Али Исмаилова, дишегьлийрин советдин председатель Тайира Мегьарамовади, зегьметдин ветеранар тир Нариман Гьажиева, Къардаш Мамалиева, Агъаверди Агъа­ева, Мейрам Вагьабовади, Рагьимат Гьажиевади, Керем Керемова, Ахцегьрин 1-нумра­дин юкьван школадин директор Сафинат Мамаевади, 11-классдин ученикри ва теклифнавай маса юлдашри  иштиракна­.

Конференция, тебрикдин гаф рахуналди, райондин культурадин управленидин начальник Къистер Гъаниевади ачухна ва РД-дин куль­турадин лайихлу работник Гуьлжагьан Яраметовади мярекат кьиле тухун давамарна.­

1929-йисуз Ахцегь район тешкилунин,  90 йисан тарихдин важиблу месэлайрикай ге­гьенш доклад райондин тарихдин музейдин директор, республикадин культурадин лайихлу работник Агьмед Дагъларова авуна.

— Ахцегьар ва  район, гьакъикъатдани, гьам тIебиатдин гуьзелвилинни девлетрин ва гьам ина бинедилай яшамиш жез хьайи бажарагълу инсанрин кьетIен макан я. Зурба тарих, куль­тура, лезги чIалан надир нугъат авай, бу­байрилай атанвай хъсан адетар хуьзвай ихьтин кьвед лагьай чка Дагъустанда мад авач. Дагъустанда хуьруьн чкада светский сифте школа (1861-йис), сифте ГЭС (1931-йис), республикада гам-халича храдай сифте фабрика (1927-йис), лезгийрин сифте театр (1905-йис), газет (1928-йис), тарихдин музей (1937-йис), обелиск (1965-йис), аэропорт (1957-йис), телеретранслятор, АТС (1966-йис), спортзал ва гзаф маса идараярни имаратар ина кардик акатна. Советрин девирда райондай 400-лай гзаф алимар (абурукай 250 кас ахцегьвияр я), гьакI зурба общественный деятелар, пагьливанар, культурадин ва маса хилерин пешекарар акъатна. Ибур, шаксуз, дамахуниз лайихлу крар — делилар я. Гьа ихьтин чешнейралди чна акьалтзавай несил тербияламишзава. Баркаван чилел гужлу чIварахрал акъвазнавай чи “тарци” гележегдани хъсан бегьерар гуда…, — лагьана ада.

Конференциядал рахай амай юлдашрини (винидихъ тIварар кьурбурулай гъейри, трибунадихъ мад са шумуд кас атана) чпин де­вирда район яшайишдинни экономикадин жигьетдай виликди финин карда хьайи агалкьунрикай итижлу суьгьбетарна.

Эхирдай “Ахцегь район” муниципалитетдин кьилин заместитель А.Шуаева конференциядин кIвалахдин нетижаяр кьуна, адан иш­тиракчийриз райондин кьиле авай ксарин патай чухсагъул лагьана.

Чи мухбир


Всего просмотров: 62

Читайте также: