Вахтунда ва хъсан ери аваз

Алатай гьафтеда Сулейман-Стальский районда муниципалитетдин кьил Нариман Абдулмуталибован регьбервилик кваз республикадин кар алай проектар кьилиз акъудунин ва абура иштиракунин месэлайриз талукьарнавай совещание кьиле фена. “Лезги газетдиз” райондин администрациядин пресс-къуллугъди хабар гайивал, адан кIвалахда Дагъустандин Халкьдин Собранидин депутат Гьамидулагь Мегьамедова, райондин депутатрин собранидин председатель Штибег  Мегьамедханова, администрациядин жавабдар къуллугъчийри иштиракна.

Кьилди къачуртIа, совещанидин сергьятра аваз “150 мектеб” программадин куьмекдалди ремонтдин кIвалахар кьиле тухузвай мектебрикай, районда “Точка роста” проект кьилиз акъудзавай гьаларикай, “Сардархуьр — ДаркIуш-Къазмаяр” водопроводдин эцигунрикай, Кьулан СтIал, Испик ва ЦIийи Макьар хуьрерин мулкар аваданламишуникай рахана.

Гьамидулагь Мегьамедова “150 мектеб” ва “Точка роста” проектар кьилиз акъу­дунин патахъай жавабдар ксариз вири кIвалахар тайинарнавай вахтунда акьал­тIа­рун чарасуз тирди лагьана. “И проектдин сергьятра аваз тамамарзавай кIва­лах­рин ери хъсан хьун патал чкадал лазим тир вири серенжемар кьабулна кIан­да. ТIвар кьунвай проектар республикадин Кьилин гуьзчивилик ква”, — лагьана РД-дин Халкьдин Собранидин депутатди.

Гьамидулагь Мегьамедов дигидай цин месэладални акъвазна. Ада и месэла вахтунда гьялун ва райондин са жерге хуьрерин агьалияр дигидай целди таъминарун лазим тирди къейдна.

Нариман Абдулмуталибова хабар гайивал, Сулейман-Стальский районда алай вахтунда 22 проект кьилиз акъудзава. Бязи объектрал проектрин сергьятра аваз тамамарзавайбурулай гъейри, алава кIвалахарни тамамаруниз мажбур жезва. “Капитальный эцигунрин управлениди, кьилин архитекторди пудратчи карханайри тамамарзавай кIвалахрал тухузвай гуьзчивал артухарна кIанда. Жемиятдин тешкилатрини гуьзчивал тухун герек я. Планда къалурнавай вири истемишунар вилив хуьх”, — лагьана совещанидин нетижаяр кьадайла райондин кьили.

«Лезги газет»


Всего просмотров: 28

Читайте также: