Вахтуналди тайинарнава

20-майдиз  Докъузпара райондин собранидин нубатдинди тушир 35-сессия кьиле фена. Райсобранидин председатель Абас Аба­сова мярекатдал алайди са месэла тирди къейдна:

— Районда арадал атай эхиримжи вакъиайрихъ галаз алакъалу яз, “До­­къуз­пара район” МР-дин кьил Абдурагьим­ Алискеров, гзаф кьадарда ришвет гунай шак фенваз, кьунва­. Тахсир субут тавунмаз, садни тахсирлу яз гьи­сабиз же­­дач… Чна райондин кьилин везифаяр вахтуналди тамамардайди хкяна кIанзава. И везифаяр администрациядин кьилин заместителрикай садал тапшурмишиз жеда.  Теклифар гун тIалабзава.

Депутатри райадминистрациядин кьилин заместитель Агьмед Агьмедован кандидатура теклифна.  “Докъузпара район” МР-дин кьилин везифаяр вахтуналди тамамардайди яз рейсадвилелди Агьмед Исрафилович Агьмедов тайинарна.

А.Агьмедов 1964-йисан 1-январдиз Мискискарин хуьре дидедиз хьана. 1986-йисуз ДГПИ-дин математикадин факультет, 2014-йисуз ДГУ-дин базадал “Государственное и муниципальное управление” пешедай курсар акьалтIарна. Муаллимвиле, школадин директорвиле, Докъузпара райондин кьилин куьмекчивиле, администрациядин информполитикадин ва пресс-къуллугъдин заведующийвиле кIвалахна. 2015-йисуз райсобранидин председателвиле хкяна. 2018-йисалай “Докъузпара район” МР-дин кьилин заместителвиле кIвалахна.

Чи мухбир


Всего просмотров: 44

Читайте также: