Шаир ва гьикаятчи Абдулрашид Рашидов рагьметдиз фена

И йикъара денбеден галу­кьай инсафсуз азардикди лап хъсан дуст, чIехи хизандин кьил, машгьур журналист, шаир ва гьикаятчи, яргъал йисара Ахцегь райондин “ЦIийи дуьнья” газетдин кьиле хьайи редактор, жегьилрин насигьатчи, РФ-дин писателрин ва журналистрин союзрин член, мугьманперес ва ин­санперес хва Абдулрашид Гьажибубаевич Рашидов рагьметдиз фена.

Ам чидай вирибуру яс чIуг­вазва, рагьметлудан хизанриз, багърийриз, мукьва-кьилийриз башсагълугъвал гузва.

А.Гь.Рашидов 1935-йисан апрелдин вацра къадим Ахцегьа дидедиз хьана. Юкьван школа, ДГУ-дин филфак куьтягьна, ада са куьруь вахтунда “Коммунист” газетдин (гилан “Лезги газет”) ре­дакцияда, ахпа та пенсиядиз экъечI­далди хайи райондин “ЦIийи дуьнья” газетдин редакторвиле кIвалахна. Адан регьбервилик кваз и газет республикадин районрин газетрин арада ви­ридалайни тарифлудаз, гуж­лу­даз, метлеблудаз элкъвена. Адан къваларив цIудралди хъсан журналистар, писателар, шаирар, драматургар, искусстводин деятелар тупламиш хьана. Газетдин тираж гьамиша винизди тир, ам райондин агьалийрин руьгьдин гуьзгуьдиз элкъвенай.

Шаир ва гьикаятчи яз, А.Рашидован эсерар гьеле алатай асирдин 60-йисарилай газетрани журналра чапзавай. Несилрив ада кхьенвай “Чешме”, “Вахтунин гьиссер” (уртах ктабар), “Илгьамдин авазар”, “Уьмуьрдин рекьер” – шиирринни поэмайрин кIватIалар, “Зайнаб”, “Кьисас” повестар, “Имтигьан” роман, цIудралди очеркарни публицистикадин макъалаяр, манийрин чIалар агакьна. Несилриз ада тунвай ирс садрани квахь тийир­ди я.

Шаирдин ва журналистдин зегьмет адаз “Дагъустан Республикадин культурадин лайихлу работник” лагьай гьуьрметдин тIвар, “Зегьметдин ветеран” медаль ва маса  наградаяр гуналди къейднава.

Чна рагьметлудан хизандиз, мукьва-кьилийриз, багърийриз, вири ахцегьвийриз, дериндай хажалат чIугуналди, башсагълугъвал гузва.

Абдулрашид Гьажибубаевич Рашидован экуь къамат чи ри­кIе­лай садрани алатдач.

“Лезги газет”


Всего просмотров: 141

Читайте также: