Шадвилин гьалара ачухна

10-ноябрдиз Мегьарамдхуьруьн районда автомобилрин Мегьарамдхуьр-Ахцегь-Рутул рекьин участок (29-40 километрияр)        тамамвилелди ремонтна акьалтIаруниз талукь мярекат кьиле тухвана. Идан гьакъиндай муниципалитетдин администрациядин пресс-къуллугъди хабар гузва. 

Рекьин участок ремонтна куьтягьуниз талукьарнавай шадвилин митинг ачухай Мегьа­рамдхуьруьн райондин кьил Фарид Агьмедова  райондин берекатлу чилел атанвай РД-дин транспортдин ва ре­кьерин майишатдин министр Ширухан Гьажимурадов тебрикна, вири мугьманрихъ ва кIватI хьанвайбурухъ сагъламвал, хушбахтвал хьана кIанзавайди алхишна. Мярекатда “Дорстройтех” ООО-дин генеральный директор Гьажияв Абдулсаламова, райондин хуьрерин кьилери, школайрин директорри, райондин агьалийри, гьелбетда, и участокда кIвалахай рекьерин работникри иштиракна.

Къейд авун лазим я хьи, автомобилрин и рехъ ремонтунин кIвалахар “Автомобилрин хатасуз, ерилу рекьер” тIвар ганвай милли проектдин бинедаллаз тухвайди я.

Мярекатдал авур вичин рахунра райондин кьил Фарид Агьмедова къейдна: “Ме­гьарамдхуьруьн райондин мулкарай яна физвай улакьрин кьадар къвердавай артух жезвайди фикирда кьурла, автомобилрин рехъ ремонт авуни, са шакни алачиз, адан ери хъсан хьуниз ва къулайвилер хьуниз куьмекда. И вакъиади чак шадвилин гьиссер­ кутазва, вучиз лагьайтIа, транспортдин гьере­кат пайгардик кутун — им райондин мулкар ви­­лик­ тухудай мумкинвал гузвай шартI я. Ида чкадин агьалийри экономикадин жигьет­дай активвал къалурунизни виликди рум гу­да. Къейд авун лазим я хьи, эхиримжи кьве йи­суз вири рекьерай чи яшайишдин шартIар акваз-акваз хъсанвилихъ дегиш жезва.

Райондин къурулушар вилик тухунихъ, яша­йишдин жигьетдай еке метлеб авай имаратар эцигунихъ галаз алакъалу месэлаяр гья­­лунин карда куьмек гунай заз Мегьарамд-хуьруьн райондин агьалийрин тIварунихъай Да­гъустан Республикадин Кьил Владимир Аб­дуалиевич Васильеваз, Дагъустан Рес­пуб­­­ли­кадин Гьукуматдиз сагърай лугьуз кIан­зава.

И рехъ  гуьнгуьна хтунал машгъул хьайи рекьерин работникарни чпи тухванвай кIва­лахдай сагърай лугьуниз лайихлу я. Автомо­билрин и рехъ ремонт авунилай гъейри, рай­он­да республикадин метлеб авай, Самур станциядихъ тухузвай автомобилрин ЦIийи Гъепцегь-ЦIийи Филер-Тагьирхуьр-Ялама рехъни дибдай цIийикIа туькIуьр хъувунин кIва­лахар давам жезва. Дагъустандин  Кьилин теклифдалди республикада, гьакI чи рай­­ондани са жерге проектар кьилиз акъудзава: “Зи Да­гъус­тан — зи рекьер”, “Зи Дагъус­тан — шегьердин къу­­лай шартIар” ва “Зи Да­гъустан — зи яд”. Алай йисуз  8,5 километрдин­ яргъивал алай Ги­лияр-Муьгъверган участокда  республикадин дережадин рехъ ремонт авун пландик кутунва”.

КIватI хьанвайбурухъ элкъвена рахай РД-дин транспортдин ва рекьерин майишатдин министрди къейд авурвал, Дагъустан Республикадин Кьил Владимир Васильева виридан вилик  зурба везифаяр эцигнава. Министерстводин вилик лагьайтIа, пландик кутунвай участокра рекьер  ремонт авунин кIвалахар ери аваз, вахтунда акьалтIарунин везифа акъвазнава.

Шадвилин мярекат кьиле фидай чIавуз Ши­рухан Гьажимурадова  рекьерин са жерге ра­ботникриз РД-дин Минтрансдин  гьуьрмет­дин­ грамотаяр, гьакIни къиметлу савкьатар гана.

Мярекатдал  разивилин келимаяр “Дорстройтех” ООО-дин генеральный директор Гьажияв Абдусаламовани лагьана. Адани рекьерин работникрив, абурун гьакъисагъ зегьмет къейд авун яз, савкьатар ва чухса­гъулдин чарар вахкана.

Шадвилин мярекат кьиле фидай чIавуз райондин общественный палатадин председатель Агъадаш Нагъметуллаева республикадин руководстводин, райондин ва ведомстводин руководстводин тIварунихъ Мегьарамдхуьруьн райондин вири агьалийрин патай разивилин келимаяр лагьана.

«Лезги газет»


Всего просмотров: 66

Читайте также: