Шад гьалара

16 -апрелдиз Каспийскда, Республикадин образованидин центрада (РЦО), “Къуй къени гафуни руьгь ахварай авудрай…” тIвар алаз кьиле тухвай яратмишунрин международный конкурсда гъалиб хьайи­бурув наградаяр вахкуниз талукьарнавай шад мярекат кьиле фена. Кьуд лагьай сеферда кьиле тухузвай и конкурсдин тешкилатчияр  Ильман Алипулатов — гъве­чIи­­­дан тIварунихъ галай “Аялриз пакадин югъ багъишин” мергьяматлувилин фонд, РД-дин образованидин ва илимдин министерст­во, Вирироссиядин урус чIалан­ни литературадин муаллимрин Ас­со­циация, “Дагъустандин муаллимрин Ассоциация” региондин общественный тешкилат (РОО) ва маса­бур тир. Конкурсда 7-йисалай 25 йи­сал къведалди яшара авай гадайризни рушариз (яшарин са шумуд категориядай) пуд чIа­лал­ди (урус, ингилис ва дидедин) чпин устадвал къалурдай мумкинвал авай.

Ана Россиядин 38 региондай, Дагъустандин саки вири муниципалитетрай, гьакIни мукьвал тир къецепатан 5 уьлкведай, санлай къачурла, 1300-дав агакьна рушарини гадайри иштиракна. Абуру са шумуд номинациядай (проза, ши­ират, драмадин эсер-пьеса, конкурсдин темадай “Пусть слово доброе душу разбудит…” ктабдиз баян гун,  конкурсдин темадай (иллюстрация тамамарнавай эсер ва иллюстрация ганвай эпизод къалуруналди) иллюстрация, фото-сюжет) чпин устадвал къалурна. 282 ишти­ракчи­ди­кай конкурсдин призёрар ва гъалибчияр хьана.

Мярекат ачухай РЦО-дин директор,  “Дагъустан Республикадин муаллимрин Ассоциация” РОО-дин президент Анжела Байрамбеговади, гьакIни РД-дин Халкьдин Собранидин образованидин, илимдин, культурадин, жегьилрин крарин, спортдин ва туризмдин рекьяй Комитетдин председателдин заместитель Гьамидуллагь Мегьамедова, ДГУ-дин электронный СМИ-рин кафедрадин заведующий, Ильман Алипулатован — гъвечIидан тIвару­нихъ галай “Аялриз пакадин югъ багъишин” мергьяматлувилин фондунин президент Ильман Алипулатова, ДГИНХ-дин ректор Яхья Бучаева, “Учитель Дагестана” газетдин кьилин редактор Басират Гьуьсейновади, “Дагъустан” ГТРК-дин директор Луиза Алихановади, РД-дин Общественный палатадин председатель Абдулхалим Мачаева ва гзаф масабуру конкурсдин макьсаддикай, аялрин алакьунрикай куьрелди суьгьбетна, адан важиблувал къейдна. РД-дин образованидин ва илимдин министерстводин, кьилди министр Уммупазил Омаровадин, гьакI амай тешкилатчийрин тIвару­нихъни чухсагъул лагьана.

Конкурсдин призёррин ва гъалибчийрин арада Кьиблепатан Да­гъустандай, иллаки Мегьарамдхуьруьн  райондай ва Дербентдай тир рушарни гадаяр гзаф авай. Кон­курсда 1-чкадиз лайихлу хьайибурун жергеда ава: Ибрагьимова Аида (Хважа-Къазмайрин школа), Будулова Раина, Агьмедханова Анжела, Усеналиева Мильвара (Азадогълидин школа), Рамазанова Айишат, Ибрагьимова Олеся, Мукаилова Муслимат, Гьажибегова Лиана, Байрамбегова Секинат (КьепIир — Къазмайрин школа), Алхасова Эльвира, Абдуллаев Эльчин (Бут-Къазмайрин школа), Мегьтиханова Мевлисат (Къуйсунрин школа), Чубанова Зейнаб,  Жаватова Абидат (Оружбайрин школа),  Эминов Амир (Дербентдин 15-нумрадин СОШ),  Хидирнабиева Хадижа (Дербентдин гимназия)  ва масабур.

Шад мярекатдин сергьятра аваз “Зи къени Дагъустан” фотоконкурсдин нетижаярни кьуна.

Конкурсда  кIвенкIвечи чкайриз лайихлу хьайи аялрин кIвалахрин  бинедаллаз “Пусть слово доброе душу разбудит…” ктаб чапдай акъуд­зава.  Гъалиб хьайибуруз ва призёрриз дипломрихъ, грамотайрихъ, къи­метлу пишкешрихъ галаз санал гьа и ктабни гун хъсан адетдиз элкъвенва.

Рагнеда Рамалданова


Всего просмотров: 35

Читайте также: