Абдулмуслимов Абдулмуслим

Са жерге гуьруьшар

Дагъустандин Гьукуматдин Председателдин заместитель — республикадин хуьруьн майишатдин ва недай суьрсетдин министр Абдулмуслим Абдулмуслимова инвесторрихъ, илимдин сообществодин векилрихъ ва хуьруьн майишатдин товарар гьасилзавайбурухъ галаз са жерге гуьруьшар кьиле тухвана.

ИкI, ада министерстводин къурулушрин подразделенийрин начальникрин ва “Кизлярагрокомплекс” ОАО-дин кьилин иштираквал аваз совещание кьиле тухвана ва абуру гьайванрин кьадар, нек ва некIедин продукция артухарунин, гьакIни гележегда ам гьялунин месэлаяр веревирдна.

Дагъустанда авай “АПК” “Ровное” ООО-дин ва исламдин бизнесдин международный ассоциациядин векил Абдула Муташгьажие­вахъ галаз гуьруьшмиш хьайила, республика­дин мулкунал товарар санлай маса гудай ва пайдай чIехи центр эцигунин месэла гьялна­.

Къейдна хьи, гьа са вахтунда 35 агъзур тонндив агакьна хуьруьн майишатдин продукция хуьдай мумкинвал авай инвестиционный проектди продукция хуьнин, гьялунин, маса гуз гьазурунин, санай-масаниз тухунин, таза продукция санлай маса гунин  месэлаяр гьялда. Эхиримжи цIийивилерин инфраструктура гьисаба кьуна проектламишнавай ва туькIуьрнавай къурулушди продукция ерилудаказ хуьдай, технологиядин рекьяй ам гьялдай ва тади гьалда маса чкайриз агакьардай шартIар яратмишда.

Жинсинин крарай Вирироссиядин илимдинни ахтармишунрин институтдин лабораториядин заведующий Михаил Павловахъ галаз хьайи суьгьбетда Дагъустандин Минсельхозпроддин кьили республикада хипе­хъанвал вилик финин месэлаяр веревирдна. Кьилин фикир регионда шуькIуь сарин ва Дагъустандин дагълух жинсинин лапагар хъсанарунин къайдайриз фикир гана.

Дагъустандин лапагрин некIедин бегьерлувиликай рахуналди, Михаил Павлова малумарна хьи, абуру Тлярата райондин майишатра талукь тир анализ кьиле тухвана. Ахтармишуни къалурна хьи, Дагъустандин хиперин некIедин ягълувал 11,4 процентдив агакьзава.

Ирандин Исламдин Республикада авай Дагъустан Республикадин Гьукуматдин векил Эмин Алиевахъ галаз гуьруьшмиш хьайи вахтунда Ирандин инвесторрин такьатар чи республикадин экономикадиз желб авунин месэлаяр гьялна. Кьилди къачуртIа, къейдна хьи, Ирандай тир карчийри шейэр санлай маса гудай ва пайдай центраяр эцигунин  проектриз, якIун продукция гьялуниз, гьакIни  агротуризмдин хел вилик финиз итиж ийизва. Идалайни гъейри, Э.Алиева малумарна хьи, алай йисан августдиз Ирандин терефди Дагъустанда вичин продукциядин  выставка тешкилун планламишзава.

13-июлдиз Абдулмуслим Абдулмуслимов РД-дин Федеральный  аграрный илимдин центрадин директор Гьасан Догеевахъ галаз  гуьруьшмиш хьана. Ада республикада  Дербент районда авай тумаринни тежрибайрин станциядин бинедаллаз питомникар арадал хкунин, майвайрин тумар гьасилунин месэлаяр веревирдна. Идалайни гъейри, Къиз­лярдин уьруьшар усал хьунин вилик пад кьун патал ва абур гележегда гуьнгуьна хутунин мураддалди  цIийи набататар арадал гъидай фикир авайдакайни лагьана. ГьакIни министрди чкадин шартIарив кьадай пIиний­рин ва ичерин сортар арадал гъунин мураддалди Буйнакскда авай емишринни майвайрин культурайрин тежрибадин станциядин те­реф грантралди хуьз гьазур тирди лагьана­.

Гуьруьшдин вахтунда Абдулмуслим Абдулмуслимов “Сила Кавказа” СПоК-дин регьбер Жамалудин Мегьамедовахъ галаз Да­гъустандин хуьруьн майишатдин товарар гьасилзавайбуру Россиядин регионрихъ, кьилди­ къачуртIа, Москва шегьердихъ галаз санал кIвалахунин мумкинвилериз килигна. Къейд­на хьи, гьар йисуз Дагъустандин ярж (бренд) хьанвай лапагдин 25 агъзур тонндилай гзаф як уьлкведин жуьреба-жуьре регионриз, гьа гьисабдай яз Москвадиз ва Московский областдиз рекье твазва. Идалайни гъейри, республикада гьар йисуз ципицIар кIватI хъувунин кьадар къвердавай артух жезва, Дагъус­тандин дуьгуь маса уьлквейриз ракъурунин мумкинвилерни хъсанбур я. Вири и крари  хуьруьн майишатдин продукция маса гудай базарар гегьеншарун истемишзава.

А.Абдулмуслимова къейдна хьи, РД-дин Минсельхозпродди республикадин хуьруьн майишатдин товарар гьасилзавайбурун, гьа гьисабдай яз набататчивилин ва малдарвилин продукция гьялунал машгъул карханайрин терефни хуьда.

Чи мухбир


Всего просмотров: 30

Читайте также: