Расим Гьажидин экуьнив агатна

9-февралдиз лезги литературадин «Марвар» ва «Шагьдагъ» кIватIалри КцIара лезгийрин машгьур гьикаятчи Расим Гьажидин эсерриз талукьарнавай мярекат кьиле тухвана. Аниз Расим Гьажидин хуьруьнвияр, чирхчирар, хайи литературадал, чIалал рикI алай инсанар атанвай.

Мярекат «Алам» журналдин кьилин редактор Камран Къурбаналиева кьиле тухвана.

Расим Гьажидин эсеррин чIалакай, ватанпересвиликай, аданни Расул Гьамзатован арада хьайи дуствиликай, «Кард» журналдин редакторвал авур чIаварикай, са гафуналди, гьикаятчидин чIехивиликай чпин фикирар Оруж Оружева, Муьшкуьрви Вакъифа, Видади Севзиханова, Шихжамал Шихметова, Тажидин Агъавердиева, Зиядхан Мурадханова, Зерифа Кьасумовади, Лезги Бегьлула, Эйваз Гуьлалиева, Римма Гьажимурадовади, ЭчIехви Абира, Бегьрам Залова ва масабуру лагьана.

Мярекатдин иштиракчияр лезги гьикаят вилик ва кьве йисалай Расим Гьажидин 80 йисан юбилей кьиле тухуникайни рахана.

Камран Къурбаналиева вилик квай мярекатрикай, крарикай малуматар гана ва абур кьиле тухунин карда гъил кьазвайбуруз сагърай лагьана.

Расим Гьажи КцIар райондин Вурвар хуьре 1941-йисуз дидедиз хьана. НафтIадин мяденра буругъчи яз кIвалахна, Советрин Армиядин жергейра къуллугъна. Махачкъалада портуна, заводдин эцигунра, Дагъустандин ктабрин издательствода корректор яз зегьмет чIугуна. Ада вичин эсерар «Коммунист» газетда ва «Дуствал» альманахда чапзава. Гьикаятчиди Москвада Литературадин М.Горькийдин тIварунихъ галай институт акьалтIарна, «Кард» журналдин редактор яз кIвалахна.

Расим Гьажи 1974-йисалай СССР-дин писателрин Союздин член, СтIал Сулейманан тIварунихъ галай премиядин лауреат, «Шолохов дидедиз хьайидалай инихъ 100 йис» медалдин сагьиб я. Адан къелемдикай гьикаятдин чIехи эсерар (романар, повестар), ктабар хкатнава. Абуруз критикади еке къимет ганва.

Расим Гьажи 2008-йисан 7-январдиз чи арада амукьнач.

“Лезги газет”


Всего просмотров: 136

Читайте также: