Рамазандин варз мубарак хьурай!

Мадни чаз азиз Рамазандин вацрахъ галаз гуьруьшмиш жедай мумкинвал гайи Сад Аллагьдиз шукур хьуй. Аллагьдин регьим, махлукьатрин хийир-дуьа ва саламатвал Рамазандин вацра Къуръан ракъурнавай, Аллагьдиз виридалайни кIани инсандиз – Мугьаммад Пайгъамбардиз  хьурай. Гьакъикъатда, Рамазандин варз Аллагьдин патай инсанар патал еке регьим я, и вацра абуруз и дуьньяда яшамиш жедай, жув тухудай къайда чирдай пак Къуръан ракъурнава.

Гьа и Рамазандин вацра Къуръан виридалайни чав мукьув тир цаварал ракъурна. Ахпа къанни пуд йисан къене жуьреба-жуьре гьалариз, вакъиайриз килигна, Пайгъамбардал  агакьар­нава. И кардикай Къуръандани лагьанва (ма­на): “Рамазандин вацра  инсанриз дуьз рехъ къалурдай  ва гьахъ батIулдивай къакъуддай Къуръан ракъурнава” (“Аль-Бакъара” сура, 185-аят).

Кьвед лагьай лайихлувал, вацран къене авай Лайлату-ль-Къадрдин йиф я.  Къуръанда лагьан­вайвал, а йифиз авур ибадат, Лайлату-ль-Къадр квачир агъзур вацра авур ибадатдилай хъсан я.

Пуд лагьай лайихлувал, Рамазандин вацра мусурманринни мушрикрин арада Бадр лугьудай чкада ягъунар хьун я. Мусурманрин кьадар  пуд сеферда тIимил тиртIани, абуру Аллагьди ракъурай малаикрин куьмекдалди гъалибвал къазанмишна. Аллагьдин Расулди  и вацракай икI лугьузвайди тир: “Эй инсанар, виридалайни чIехи ва берекатлу варз алукьнава. Агъзур вацра­лай хъсан йиф авай варз, юкъуз сивер хуьн ферз авунвай ва йифиз ибадат авун суваб авунвай варз.

Ни и вацра сувабдин ибадат авуртIа, адаз ферз тир ибадат авур кьван сувабар кхьида, ни ферз тир ибадат авуртIа, адаз маса варцара пудкъанни­ цIуд ферз тир ибадат авур кьван суваб кхьида.

Им сабур ийидай варз я, сабурдин сувабни Жен­нет я. Им иман гъанвайбурун рикIер секинарзавай ва ризкьи артухарзавай варз я. Ни сив хвен­вай­ касдиз нянихъ сив хкуддайла тIуьн гайитIа, адазни сив хвейидаз хьайи кьван сувабар жеда, адан гунагьрилай гъил къачуда ва Жегьеннемдин­ цIукай ам къутармиш жеда”.  Асгьабри лагьа­на:­ “Я Расуляллагь, бес чакай нивай хьайитIани сив хвейидаз тIуьн гуз алакьдач эхир?” Пайгъам­бар­ди­  жаваб хгана: “Са хурма ва я са хупI нек­­ гайи­­тIани адаз инал лагьай кьван суваб же­да”­. Мадни гьадисда лагьанва: “Рамазандин вацран сифте кьил рагьмет, юкьв гунагьрилай гъил къачун ва эхир Жегьеннемдин цIукай азад авун я”.

Шамил-гьажи Омаров


Всего просмотров: 44

Читайте также: