Мусибатдин йикъар

Ватандин ЧIехи дяведи советрин халкьдин уьмуьрда кьетIен гел туна. Кьуд йисуз ара датIана давам хьайи и завалди миллионралди советрин инсанар телефна, хуьрер, шегьерар бар­батIна.

Дяведин рикIелай тефидай йи­къар чавай къвердавай яргъаз ­къа­къатзава. Алай йисуз чна немсерин чапхунчийрин винел ЧIехи гъалибвал къазанмишайдалай инихъ 75 йис тамам хьун шад гьалара къейд­да. И важиблу, кьетIен вакъи­адал ча­­вай гьахълудаказ дамах ийиз же­да.

Садазни сир туш хьи, душмандин лап чIуру ниятрикай сад Ленинград шегьер кьун тир. Немсерин гьалкъада гьатай агьалийри, каш, мекь эхна, хар хьиз  гуьллеяр, артиллериядин снарядар къваз­вай­тIани, душ­мандихъ галаз женг чIу­гу­на. Эхирни 1944-йисан январдиз шегьер­ душмандин гьалкъадай акъудна. И важиблу вакъиадиз талукь яз Кьурагьрин 1-нумрадин юкьван школада тарихдин муаллим Алибегова Ифриза мярекат  кьиле тухвана.

Муаллимар тир Катибова Зинаидади, Къазиева Шафигади, Алибегова Ифриза гьа вахтунин карточкаяр ва фан кьадар гьазурна, кIватI хьанвайбуруз къалурна. Гаф тарихдин муаллим Марият Рагьимхановадиз гана.

— Гьуьрметлу аялар, играми муалли­мар,  Ленинград душмандин гьалкъада хьайи вакъиайрикай рахун заз кьадарсуз четин я. Шегьердин аялри, дишегьлийри, яшлу итимри гзаф азиятриз дурум гана. Неведал алай баркаллу шегьер душмандиз муьтIуьгъ хьанач.

Шегьер саки 900 юкъуз гьалкъа­да хьуникай, советрин халкьдин кьегьалвилерикай директор Гьамид Мисриева ва кIелу­нинни тербиядин рекьяй директордин заместитель Валентина Рамазано­вади суьгьбетна.

Мярекатдал аялри Ватандин ЧIехи дяведиз талукьарнавай шиирар кIелна, дяведин йисарин  манияр тамамарна. Шегьер гьалкъада­ хьуниз талукь яз гьазурай кинофильмди аял­рин зигьинда иллаки кье­тIен гел туна.

Школада кIелунинни тербиядин кIвалах вини дережадиз акъудунин, аялриз ватанпересвилин тербия гунин  мураддалди Ватандин ЧIехи дяведихъ галаз алакъалу мяре­катар мукьвал-мукьвал кьиле тухузва.

Гьамият  Семедова,

лезги чIаланни литературадин муаллим


Всего просмотров: 54
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире