Муфтий дагълух хуьрерин гьаларикай рахана

Дагъустандин муфтий Агьмад  Абдулаева  малума­райвал, коронавирусдин тIугъ­валдихъ галаз алакъалу лап муракаб гьалар республикадин дагълух хуьрера арадал атанва.  Адан гафаралди, хуьрера авайбур анжах медпунктар я, анра хаталу азаррикди начагъ хьанвайбур сагъардай мумкинвилер авач. Азарлубур къаткурдай мумкинвилер тахьунилай гъейри, анра медицинадин къуллугъчиярни бес жезвач. Идан гьакъиндай Дагъустандин муфтий Агьмад Абдулаева РФ-дин Президент Владимир Путина Да­гъустандин руководстводихъ ва жемиятдин векилрихъ галаз сове­щание кьиле тухвай вахтунда лагьана.

“Исятда Дагъустанда гьалар лап четинбур я, дагълух хуьрера анжах кьезил азаррикди начагъ хьанвайбуруз куьмекар гудай медпунктар я кардик квайбур. Залан азарри акIажарзавайбур гьамиша районрин центрайриз, Махачкъаладиз ва маса шегьерриз ракъурзавайди я. Исятда им намумкин  кар я, вучиз лагьайтIа вири азарханаяр ацIанва, гьавиляй кьенвайбурун кьадарни гзаф я. Статистикадин делилралди, республикада 700-далай гзаф ксар, 50 кьван медицинадин къуллугъчиярни кьенва. И рекъемар, гьайиф хьи, югъ-къандавай артух жезва”, — лагьана А. Абдулаева.

Адан гафаралди, яргъара авай дагълух районра коронавирусдикди  кьенвайбурун кьадардин статистика асул гьисабдай кьиле тухузвач. “Чпин кIвалера рекьизвай инсанрин кьадар садани тайинарзавач. Абур рекьизва, адетдин къайдада кучукзава, амма садани гьисабзавач”, — гъавурдик кутуна муфтийди.

Ада алава хъувурвал, дагълух мулкарин агьалийриз Муфтиятдин къуллугъчийри куьмекар гузва. “Азарлу туширбуру ва я сагъ хъхьанвайбуру кIва­лах­­зава, Дагъустандин хуьрериз физва, психологиядин жигьетдайни куьмекзава, абуру медикаментарни, недай суьрсетарни, кислороддин аппаратарни тухузва. Ибур вири халкьдин куьмекдалди кIватI­завай такьатрихъ ийизвай мергьяматлувилер я, инсанри Муфтиятдихъ галаз ала­къа хуьналди сада-садаз куьмекар гузва”, — лагьана Агьмад Абдулаева.­

«Лезги газет»


Всего просмотров: 55
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире