Москвада тешкилна

7-июндиз Москвада, Гъалибвилин паркуна авай Мемориалдин мискIиндин патав, лезги халкьдин векилри сивер хуьзвай му­сурманриз тIуьн гуниз талукьарнавай мярекат кьиле тухвана. Мергьяматлувилин “ЛЕКИ” фондуни ва ФЛНКА-ди тешкилай и мярекат чешнелудаказ кьиле тухун патал “Самур” ООО-ди, “Абад Кье­пIир” фондуни, “Кавказские умельцы” туьквенди ва уьлкведин жуьреба-жуьре регионра авай чи ватанэгьлийрини куьмекар гана.

Къейд ийин хьи, Рамазандин вацра Москвадин Мемориалдин мискIиндин па­тав жуьреба-жуьре халкьарин векил­ри­ сивер хуьзвайбуруз тIуьнар гуз са шу­муд­ йис жезва. И проектдик (адаз гьакI­ни “Шатер Рамадана” лугьузва) сифте яз кьил кутурди Моск­вадин мусурманрин Управление я.

Лезги халкьдин векилри кьиле тух­вай­ мярекатда 1000-далай виниз инсанри иш­тиракна. Абурун арада ФЛНКА-дин президент Ариф Керимов, РАН-дин востоко­веденидин Институтдин директордин заместитель Аликбер Аликберов, “ЛЕКИ” фондунин руководитель Гьасан Гьасанов, Плеханован тIва­ру­нихъ галай РЭУ-дин проректор, экономи­­­кадин илимрин доктор Асали Асалиев, машгьур журналист ва политолог Рус­лан­ Къурбанов, нашидар кIе­лунин ус­тад­ Заур Са­лигьов, “Кавказские умельцы” туьквендин регьбер Герман Ма­ме­дяров ва хейлин масабур авай.

Мярекатдин сергьятра аваз Руслан Къурбанова лезги халкьдин тарихдикай, лезгийри дин кьабулуникай итижлу суьгьбетар авуна, Заур Салигьова пак Къуръандин аятар ва нашидар кIелна.

Гьасан Гьасанова диндин межлис кьиле тухун патал пулдин куьмекар гайи вири­буруз сагърай лагьана ва “ЛЕКИ” фондуни Кьиблепатан Дагъустанда тешкилза­вай серенжемрикай гегьеншдиз ихтилатна­.

Сив хкудайдалай гуьгъуьниз мярекатдин иштиракчийрин арада лезги халкьдин тарихдиз ва медениятдиз талукь суалрикай ибарат викторина кьиле тухвана. Асул вад суалдиз дуьз жавабар гайибур Герман Мамедярова гьазурнавай пишкешриз ла­йихлу хьана.

Агьмед Магьмудов


Всего просмотров: 17

Читайте также: