Милли меденият хуьнин рекье

Кьисметди хайи ерийривай яргъариз акъуднавай чи ватан­эгьлийрикай сад алай вахтунда Ярославль шегьерда яшамиш жезвай  Расим  Гьажимирзаевич  Бакаров  я. 

Ам 1957-йисан 5-декабрдиз КцIар районда дидедиз хьана. КцIа­ра юкьван мектеб куьтягьай­далай­ кьулухъ гъвечIи чIавалай му­зыкадиз итиж ийиз­вай же­гьил­ди 1974-1978-йисара Дербентдин муз­­училищеда чирвилер къачуна. Гуьгъуьнлай Къи­зи­­люрт шегьердин музыкальный мектебда му­ал­лим­виле кIвалах­на. Армиядин жергейра къуллугъна хтайдалай кьулухъ, 1981-йисалай, му­зыка­дин рекьяй алакьунар авай жегьил пешекарди КцIар шегьердин искусстводин мектебда кIвалахун да­вамарна. Р.Бакаров кьиле аваз райондин шад мярекатра гурлу концертар гун тешкилна.

Адакай 1987-йисуз Москвада кьиле фейи халкьдин яратмишунрин фестивалдин лауреат хьана. 1988-йисуз “Шагьдагъ” муз­­дестедик кваз ада Баку шегьерда кьиле фейи Польшадин ма­­нийрин фестивалдани иштиракна. Лезгийрин арада Расим Ба­­­каров еке устадвални агал­кьу­нар авай чIагъанчи хьиз машгьур я.

Халкьдин милли меденият вилик тухунин карда датIана гьерекатдик квай пешекарди 1989-йисуз “Кард” тIвар алай лезги манийринни макьамрин цIийи десте арадал гъана. КIвачел акьалтна са йис кьван тамам хьайи “Кард” дестеди 1990-йисуз Москвада Губкинан тIвару­нихъ галай университетдин клубда ва М.Горькийдин тIварунихъ галай ял ядай багъдин сегьнейра чIехи концертар гана. Са куьруь вахтунда бажарагълувални пешекарвал себеб яз машгьур хьайи “Катраз” Туьркиядизни теклифна. Лезги музыкадин дестеди, халкьдин яратмишунрал бинеламиш хьанвай концертдин программа гваз, Туьркиядин 16 шегьерда халкьарин фестивалра иштиракна.

1994-2009-йисар Расим Бакарован уьмуьрда виридалайни четинбур зулуматдинбур хьана: гуя лезгийрин “Садвал” гьерекатдин иштиракчи я лугьуз, тамам 15 йисуз ам Азербайжандин дустагъда ацукьарна. Азад хъувурдалай кьулухъ ам вичи кIва­ла­хай мектебдани кьабул хъувунач. Чирхчирри ва дустари адаз Ярославль шегьердиз атун теклифна.

Расим Бакарова пуд рушни са хва чIехи авуна. Адан веледар Россиядин жуьреба-жуьре шегьерра яшамиш жезва.

“Кард” дестедин рехъ Расим Бакарова Ярославль шегьердани давамарзава. Адалайни гъейри, ана кардик квай лезги медениятдин “ЯРЛНКА” тешкилатдихъ галаз санал милли кьуьлердайбурун “Дагъларин везинар” ансамблдин кIвалах­дикни къуьн кутазва.

Расим Гьажимирзаевич хайи халкьдал, хайи чилел кьарувалзавай ватанперес инсан я. Кьисметди яргъаз акъуднаватIани, ам мукьвал-мукьвал ватандизни хквезва.

“Зак лезги руьгь кутурди рагьметлу шаир, зи му­аллим, чIехи инсан, ялавлу ватанперес Лезги Нямет я”, — къейдзава Расима.

Милли меденият хуьнин рекье зегьмет чIуг­ваз­вай устаддихъ къуй сагъвал ва мадни агал­­кьу­нар хьурай!

Куругъли Ферзалиев


Всего просмотров: 109

Читайте также: