Мергьяматлувилин къанунралди

Алатай гьафтеда, вилерин ишигъ квахьнавайбурун международный йикъан сергьятра аваз, Махачкъалада республикадин машгьур спортсменрин ва  Дагъустандин вилерин ишигъ зайифбурун хкянавай командадин арада футболдай мергьяматлувилин дуствилин къугъун кьиле фена. Дагъустандин жемятдин машгьур деятелар тир Булач Чанкалаеван ва Шихсаид Шихсаидован куьмек галаз и къугъун тешкилайди РД-дин зегьметдин ва яшайишдин жи­гьетдай вилик тухудай министерстводин жегьилар кIвалахдалди таъминардай республикадин “Агалкьун” (РМЦЗ) центрадин, Россиядин Ворлдскилс ва Абилимпикс гьерекатрин РКЦ-дин (региональный координационный центр) регьбер  Шамил  Мегьамедов  я.

ИкI, республикадин машгьур спортсменрин командадик азаддаказ кьуршахар кьунай Дагъустандин хкянавай командадин старший тренер Гьайдар Гьайдаров, футболистар Шамил Лахиялов ва Шамил Асильдаров, республикадин азаддаказ кьуршахар кьунай жаванрин хкянавай командадин тренер, Европадин чемпион Магьмуд Мегьамедов ва масабур квай.

Къугъун вилериз зайифдиз аквазвайбур патал футболдин вири истемишунрал амална кьиле тухвана. ИкI, махсус тупунал къугъунилай гъей­ри, республикадин машгьур спортсменрикай ибарат командадин футболистрин вилер махсус маскайралдини айнайралди кIев­навай.

Къугъунин тешкилатчи Шамил Мегьамедован гафаралди, и серенжемдин макьсад вилериз зайифдиз аквазвайбурун ва буьркьуьбурун хци месэлайрал общественностдин фикир желб авун, сагълам ксариз (вилериз зайифдиз аквазвайбурун чкадал хьуналди) чпин уьмуьрдин къадир чируникай ибарат тир.

Дуствилин къугъунин нетижайриз килигна, вилерин ишигъ зайифбурун командадиз “KingsMan” парталрин туьквендиз сертификатар ва къиметлу маса пишкешар гана.

Гуьгъуьнлай къугъунин иштиракчийри ва тамашачийри вилерин ишигъ зайифбурун хци месэлаяр веревирдна.

«Лезги газет»


Всего просмотров: 60
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире