Эцигунар ахтармишна

10-декабрдиз РД-дин Гьукуматдин Председателдин заместитель Владимир Лемешкоди Мегьарамдхуьре  60 аялдиз чка жедай аялрин бахча эцигунин кIвала­хар кьиле физвай гьал ахтармишна, хабар гузва РД-дин Кьилин ва Гьукуматдин администрациядин пресс-къуллугъди.

Аялрин цIийи бахча эцигуни муниципалитетдин центр тир и хуьре школадиз фидалди гузвай образование агьалийрин гегьенш къатарин тIем акакьдайди  ийида. Къейд ийин,  райондин мулкунал ина  пограничникрин хизанарни яшамиш жезвайди фикирда кьурла,  аялрин цIийи бахча эцигунин игьтияж екеди тирди якъин жезва.

Кьилин пудратчи  РФ-дин оборонадин министерстводин Кьилин военный ва эцигунрин управление я. Объект федеральный бюджетдай чара ийизвай такьатрин гьисабдай эцигзава.

Алай вахтунда эцигунрин майдандал хейлин кьадар кIвалахар тамамарнава.  ЦIийи дарамат алай аямдин истемишунриз жаваб гудайди я.  Эцигунрин кIвалахар кьве сменадин къайдада тамамарзава. Объект ахтармишай Владимир Лемешко эцигунрин кIвалахар кьиле тухузвай жуьредилай рази яз амукьна. 25-декабрдиз цIийи бахчади райондин аялар патал вичин ракIарар ачухун гуьзлемишзава.

Владимир Лемешкоди гьакIни Мегьарамдхуьруьн райондин Самур хуьре  504 аял патал фикирда кьунвай мектеб эцигунин кIвалахар  кьиле физвай тегьерни ахтармишна.  Ина цIийи школа гьеле 2008-йисуз эцигиз башламишнай, амма гуь­гъуьнлай объектдал кIвалах зайиф хьана.­

Алай вахтунда мектеб эцигна куьтягьунин  кIвалахар  Республикадин инвестицийрин  программадин сергьятра аваз тамамарзава, кьилди къачуртIа,  122 миллионни 260 агъзур манат чара авун фикир­да кьунва. Сентябрдин вацра  конкурсдин нетижада “Стройтехнохолдинг” ООО-дихъ галаз икьрар кутIунна.

Къенин юкъуз школадин асул дарамат­ эцигна куьтягьнава,  тIуьнар гудай чка ва спортзал эцигунин кIвалахар кьиле физ­­ва. Объект ахтармишай В.Лемешкоди мектебдин важиблувал къейдна ва ви­ри кIвалахар ерилудаказ авуниз эвер гана.

КIелунин цIийи йис алукьдалди (2020-2021-йисарин) алай аямдин вири истемишунриз жаваб гудайвал туькIуьрнавай шко­­ла ишлемишиз вахкун планламишнава.

Жасмина Саидова


Всего просмотров: 56
Подпишитесь на наши каналы:

Читайте также:


Новости партнеров