Луту-птуйрикай гьикI хуьда?

Банкунин счетдай пул чуьнуьхун патал луту-птуйри  гьамиша цIийи къайдаяр ва рекьер туькIуьрзава, малумарзава  Россиядин Банкунин Кьиблепатан ГУ-дин Дагъустан Республикада авай Милли банкунин отделенидин  пресс-къуллугъди.

Месела, банкунин картадин иесидиз гуя  банкунин къуллугъчидин патай зенг къвезва, картадилай пул алуднавайдакай хабар гузвай. Кьиле тухванвай серенжем тестикьарун ва я кьабул тавун патал луту-птуди  кар­тадин иесидиз талукь ва я картадин гьакъиндай делилар, гьа гьисабдай яз ПИН ва я  CVV-код (картадин кьулухъ галай рекъемар)  лугьун тIалабда.

 Низ  талукь  я?

Асул гьисабдай,  луту-птуйрин алдатмишунрик яшлу ксар, пенсионерар акатзава. Абуру чеб неинки банкунин къуллугъчияр, гьакI государстводин идарайрин векилар, ад­вокатар я лугьунни мумкин я. Инсанар инанмишарун патал чIуру ният авайбуру “къараррин», «суддин къараррин”, гьатта паспортрин ва къуллугъчийрин шагьадатнамайрин  ерилудаказ гьазурнавай  копияр агакьарзава.­

Вуч  ийида?

  • хабар кьазвай делилар лугьудач ва ихтилат кьатIда;
  • банкунин картадин кьулухъ галай, я тахьайтIа, сайтда къалурнавай официальный нумрадай банкуниз зенг авуна кIанда.

Эгер  куьне  луту-птудиз картадикай дели­лар лагьанатIа ва куь картадилай законсуздаказ  пул алуднаватIа, куьне ингье вуч авун  лазим ятIа:

  • банкунин карта  мобильный приложенидин куьмекдалди агалун, я тахьайтIа карта акъуднавай банкунихъ галаз телефондай алакъалу хьун;
  • банкунин отделенидиз арза кхьена, счетдиз талукь делилар тIалабун ва кьиле тухванвай сернежемдихъ галаз рази туширвилин гьакъиндай кьве чарчел алаз арза кьхьин;
  • къайдаяр хуьдай органриз пул чуьнуьхнавайдан гьакъиндай арза кхьин.

Банкда авай счетдилай законсуздаказ пул алудунин вилик пад кьун патал, и картадихъ галаз алакъалу яз, суткадин вахтунда ийиз­вай серенжемрин кьадар тайинарун ва, идахъ галаз сад хьиз, картадилай ийизвай серенжемриз талукь СМС-хабарар кардик кутун.

Эвездин  пул  вахчун  мумкин  яни?

Муьштеридин патай арза кьабулайдалай кьулухъ банкди силис тухузва, адан нетижайрал асаслу яз, эвездин пул гунин гьакъиндай къарар кьабулзава, я тахьайтIа,  ганвай зарар эвез хъувун отказ авунин  себебрикай лугьузва. Пул вахкуда, эгер карта гвайда ам ишлемишунин, гьа жергедай яз  адан хатасузвилиз талукь шартIар чIурнавачтIа ва банкуниз вахтунда атанатIа, яни, эгер ам банкуниз  серенжем кьиле тухванвайдан гьа­къиндай хабар агакьайдалай кьулухъ са йи­къалай гзаф вахт алатнавачтIа.

Амма, эгер картадай пул чуьнуьхун жуван игьтиятсузвилин нетижада ятIа, месела, эгер гражданинди тахсиркарриз картадикай делилар хушуналди ганатIа, банкуниз чуьнуьхай пулар вахкун тийидай ихтияр ава.

Россиядин Банкуни  республикадин агьа­лийри рекъемрин технологийрихъ галаз ала­къалу крара михьивал ва игьтиятлувал хвена кIанзавайди садрани рикIелай ракъур таву­низ эвер гузва. Интернетдихъ галаз кIвалах­дайла, жуван финансрин хаталувал таъминарун патал рекъемрин хатасузвилин къайдайрал амал авуна кIанда. И ва я маса суалар­ ва шаклувал арадал атай дуьшуьш­ра  та­­ди гьалда банкуниз зенг авуна кIанда — те­ле­фон­дин нумра картадин кьулухъ патал ала.

«Лезги газет»


Всего просмотров: 42

Читайте также: