Лайихлу пай кутунай

Сулейман – Стальский райондин  КIварчагърин хуьре кардик квай 1 -нумрадин ДЮСШ – да боксдин секциядин тренер –  муаллим, Россиядин спортдин мастервиле кандидат  Альберт Межидов “Лезги газет” кIелзавайбуруз фадлай таниш кас я. Адан гъилик тербия къачузвай хейлин боксёрри райондин, республикадин, ЮФО-дин ва Вирироссиядин турнирра къазанмишзавай агалкьунрикай чна газетдин чинриз мукьвал-мукьвал хабарар гузва. ИкI, тренердин гъилик тербия, вердишвилер къачур ва  исятдани къачузвай боксёррикай 50 – дакай  (республикадилай къеце – 20, республикадани – 30) республикадин ва ЮФО – дин акъажунрин чемпионар ва призёрар хьанва.

А. Межидова 2001-йисалай инихъ КIварчагърин 1-нумрадин ДЮСШ-да зегьмет чIугвазва.

Республикада физический культура ва спорт вилик тухуник лайихлу пай кутунай, яргъал йисара гьакъисагъвилелди  зегьмет чIугунай ва агалкьунар къазанмишунай ам райондин кьиле авай ксарин,  республикадин физический культурадин ва спортдин министрдин  патай гьуьрметдин грамотайриз лайихлу хьана.

ЦIийи йисан вилик квай йикъара чав са шад хабар мад агакьна:  Россиядин спортдин министр Павел Колобкован къул алаз Альберт  Межидоваз Россиядин Федерацияда физический культурадин ва спортдин хел вилик тухуник еке пай кутунай  чухсагъулдин чар хтанва. Чна адаз шабагь мубаракзава.

Рагнеда Рамалданова


Всего просмотров: 20

Читайте также: