Къуръандин аятрин баянар

(Эвел — 23-25-нумрайра)

  1. Ва (рикIел гъваш куьне гьакI­ни) куьне: “Эй, Муса! Чун вахъ гьич инанмиш жедач, та чаз Аллагь ачухдиз аквадалди” лагьай вахт. Ва куьн цIайлапанди кьуна (ва квев кьиникь агакьна), куьн килигиз-килигиз.
  2. Ахпа Чна квел чан хкана куьн (цIайлапанди) кьейидалай кьулухъ, куьне шукур авун патал!
  3. Ва (гьакIни) Чна квез цифералди хъен авунай ва Чна квез манну (тарарал жедай ширишдиз ухшар тир, ви­ртIедин хьтин дад галай шей) ва сальва (чуьлдин къушарин са жуьре — туртурар) авудна ракъурнай (ва лагьанай): “Неъ куьне, Чна квез ба­гъишнавай хуш няметрикай (пай ганвай хъсан рузидикай ва ибадат ая Аллагьдиз). (Амма абуру асивална ва шукур авунач абуру няметрин). Ва (а кар­далди) абуру Чаз зулум авунач, амма зулум абуру (анжах) чпиз авуна.
  4. Ва (рикIел гъваш куьне гьакI­ни) Чна (квез) лагьай вахт: “Гьахь куьн и хуьруьз (Байт-уль-Макъдис шегьер­диз) ва неъ (анавай хуш няметрикай) квез кIани чкадай ана булдиз ва нушдиз. Ва гьахь куьн (а шегьердин) варарай сажда ийиз (икрам ийиз, Аллагьдиз муьтIуьгъвализ) ва лагь: “гьитIтIатун” (гаф) (Рабби, алуда чалай чи гунагьар), (ва) Чна куь хатаяр­ни (гунагьарни) багъишда, ва хъсан крар ийизвайбуруз мадни артухарда (хийирар ва сувабар)”.
  5. Ва чпи зулум авурбуру (Исраилан несилрикай) (чпиз Аллагьди эмирнавай) гафар абуруз лагьайдалай гъейрибуралди табдил авуна (гафарни дегишарна ва крарни масакIа авуна), ва (гьавиляй) Чна (а) зулум авурбурал цавай азаб (тIегъуьн) авудна, абуру фасикьвал (Аллагьдиз асивал) авуниз килигна.
  6. Ва (рикIел гъваш куьне гьакI­ни Чна квез гайи нямет куьн Синайда къумлух баябан чуьлда цихъ къанихбур яз) Мусади вичин халкь патал­ (Ча­вай) яд тIалабайла, ва Чна адаз лагьанай: “Ягъа жуван асадал а къван”. (Ада ам асадалди яна) ва адай (а чIехи къванцяй) цIикьвед чешме (булах) акъатна (Бану — Исраилдин­ сихилрин кьадар тирвал) — гьар садаз (а сихилрикай) чпин “­яд хъвадай чка”, (чпин булах) чир хьана. (Ва лагьана Чна абуруз): “Неъ ва хъухъ (куьне) Ал­лагьдин (патай тир) ризкьидикай ва чIуру крар ийиз писвал чукIурмир (куьне) чилел”.
  7. Ва (рикIел гъваш гьакIни) куьне: “Эй, Муса! Чавай гьич сабуриз же­вач гьа са тIуьнал (чи рикI янава гьа са тIуьникай). Бес, дуьа ая жуван Раббидиз (тIалаба жуван Рабби­дивай) чун патал, къуй Ада чаз акъуд­рай­ чили битмишарзавайдакай; адан ­майвайрикай, афнийрикай, серкерикай, мержемекрикай ва чичIекрикай” ла­гьай­ вахт. Ада (Мусади) лагьана: “Бес, куьне лап хийирлу шей — усал тир­­дахъ­ дегишарзавани (квез Аллагьди хкянавай и тIуьнар туна — усал, агъа дережадин тIуьнар тIа­лабзавани)?! ЭвичI (куьн и къумлухдай) шегьердиз, гьакъикъатда квез (ана) куьне тIалаб авур шей жеда”. Ва (абуру авур а крариз килигна), абурал гьамишалугъ яз агъузвал ва кесибвал ракъурнава, ва абур Аллагьдин азабдик акатна (абурун гьал — Аллагьдин патай ажугъ алай гьалдихъ элкъвена). Ам (а жаза) абуру Аллагьдин аятрихъ (делилрихъ) кафирвал авурвиляй ва (абуру) пай­гъам­барар са гьахъни авачиз (гьахъсуз) яна кьинай я. Ам абуру (Ал­лагь­диз) асивал авурвиляй ва (чпин Раббиди эцигнавай) сергьятар чIу­рай­ви­ляй я!
  1. Гьакъикъатда, (чпи) иман гъайи­бур (муъминар Мугьаммад пай­гъам­бардин уьмметдикай) ва (Мугьаммад пайгъамбардилай вилик хьайи уьмметрикай) чпи чувуд дин кьиле тухвайбур (Тавратдиз табий хьайибур), ва “насара”-яр (Иса пайгъамбардин диндиз табий хьайибур, насраний-Насира — лугьудай хуьруьн тIвар­цIелай атанвай гаф я) ва “сабий”-яр (маса диндиз табий тахьана, чпин тIебиатрал аламай ксар), ни (абурукай) Аллагьдихъ ва Эхиримжи Йикъахъ иман гъа­натIа ва диндар амал авунатIа (гьарда чпин девирда хьайи пайгъам­барри гъайи дин кьиле тухвана. Ахпа Мугьаммад пайгъамбар атайдалай кьулухъ вири инсанриз важиблу я Исламдиз табий хьун), абуруз чпин суваб абурун Раббидин патав жеда, ва жедач абуруз я кичIевал, я пашманвал.
  2. Ва (рикIел гъваш куьне гьакIни) Чна квевай “кьинералди мягькемарнавай икьрар (агьт)” къачур вахт ва Чна куь винел ТIур-дагъ хкажнай (ва лагьанай): “Къачу (кьабула ва кьиле твах) куьне Чна квез багъишнавай шей (Мусадиз ракъурнавай вагьй авай ктаб) кIевивилелди, ва рикIел гъваш куьне ана авайди (фикир- фагьум ая ана авайдал), квез (Аллагьдихъай) ки­чIе хьун патал.
  3. Ахпа, адалай гуьгъуьниз куьн (мад) кьулухъ элкъвена (Чи эмирдикай), ва эгер квез Аллагьдин (патай) мергьямат (куь туба кьабулун) ва регьим тахьанайтIа, куьн, дугъриданни, еке зиянвал хьайибурукай жедай!
  4. Ва гьакъикъатда, квез чир хьан­вай (эй чувуд дин гвайбур) квекай киш юкъуз сергьятар чIурайбурун гьакъиндай (гьикI абур Чна жазала­мишнатIа), ва Чна абуруз лагьанай: “Хьухь квекай негь хьанвай маймунар (элкъуьгъ куьн усал маймунриз)”.
  5. Ва Чна ам (а азаб хьайи хуьр) ибрет яз (вичикай эсер жедай мисал яз) авуна адан вилик квайбурузни (патарив гвай хуьреризни) ва адалай кьулухъ къвезвайбурузни (гуьгъуьналлайбурузни), ва насигьат яз Аллагьдихъай кичIебуруз.
  6. Ва (рикIел гъваш куьне эй, Бану-Исраил) Мусади вичин халкьдиз лагьай вахт: “Гьакъикъатда, Аллагьди квез кал тукIун эмирзава”. Абуру лагьана: “Вуна чун ягьанатрай кьазвани?” Ада лагьана: “За Аллагьдивай тIалабзава зун авамрикай хьуникай хуьн (Аллагьди яргъазрай а кардикай)”.
  7. Абуру лагьана: “Дуьа ая (тIа­лаба, ялвара) вуна жуван Раббидиз чи патахъай, баян гудайвал Ада чаз, ам гьихьтинди ятIа”. Ада лагьана: “Гьа­къикъатда, Ада лугьузва хьи: “Гьакъи­къатда, ам я кал — вич я яшлу тушир, я (лап жегьил) дуьгве тушир, юкьван яш авай адан арада”. “(Тади ая, куьне гила) кьилиз акъудиз квез эмирнавай кар!”.
  8. Абуру (мад гьуьжетиз) лагьана: “Дуьа ая (тIалаба, ялвара) вуна жуван Раббидиз чи патахъай, баян гудайвал Ада чаз, гьихьтин рангунинди ятIа ам”. Ада лагьана: “Гьакъи­къат­да, Ада лугьузва хьи: “Гьакъи­къат­да, ам я кал — хъипи, вичин ранг туьнт хъипиди тир, вичини (адаз) тамашзавайбур шадарзавай”.

(КьатI ама)

Таржума авурди — Ямин Мегьамедов,

диндин рекьяй алим


Всего просмотров: 37
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире