Къуллугъун хъсан жезва

Къадим Дербент йикъалай-къуз чIе­хи жезва, гьам кефер ва гьамни кьиблепатахъ вичин сергьятар гегьеншарзава. И барадай кьиле лезги халкьдин уьтквем  рухвайрикай сад тир Гьажи Ражабович Жабраилов авай “Дагюгстрой” ОАО-дин кIвенкIвечи коллективди шегьердин кьиблепата арадал гъанвай кIуьд мертебадин (Санкт-Петербургдин проектдин  бинедаллаз) 25 кIваликай ибарат “Южный” микрорайонди Дербентдин акунар, къамат аваданвилихъ дегишарнава.

Кар ана ава хьи, шегьер чIехи жердавай анин агьалийриз транспортдин рекьяй къуллугъунин кIвалах хъсанарунин месэлани арадал къвезва ва разивализ жедайвал гьялни ийизва. Алай вахтунда Дербентда автотранспортди пассажирар дашмишдай къадав агакьна къенепатан маршрутар кардик ква. Къиметарни  акьван багьабур туш  — шегьердин яргъа чкайризни кваз 15 манатдихъ физ жезва.

Гьелбетда, къенепатан маршрутра пассажирриз къуллугъдай автобусрин кьадарни артухарна кIанзава. Шегьердин администрацияди и месэла гьялун рикIелай алудзавач. Гьам чIехи ва гьамни микроавтобусрин кьадар йисалай-суз гзаф жезва.

ЦIи и кIвалах генани хъсан жеда. Шегьердин кьил Хизри Абакарованни пас­са­жирар дашмишунал машгъул тир “Спек­тор” компаниядин директор Мегьамед Мегьамедован гуьруьшдин вахтунда малум хьайивал, мукьвал вахтара Дербентдиз къенепатан маршрутар патал цIийи 20 микроавтобус хкида. Йисан эхирдалди абурун (алавабурун) кьадар генани артух жеда — 100-дав агакьда.

Им шегьерда цIийи, алава маршрутарни кардик акатда лагьай чIал я.

Къейдна кIанда хьи, мергьяматлу кас тир М.Мегьамедова, вичин хсуси та­кьатар ишлемишуналди, шегьердин аялринни жаванрин яратмишунрин дворецдиз (ДДЮТ) ва спортшколайрикай садаз 2 микроавтобус къачун хиве кьунва.

Нариман Къарибов


Всего просмотров: 25

Читайте также: