Къиметар дегиш хьанва

Сад лагьай июлдилай  Дагъустан Республикадин агьалияр патал  газдин къиметар дегиш хьанва. Дагъустан Республикадин тарифрин рекьяй къуллугъди 2018-йисан   22-июндиз  кьабулай  8-нумрадин къарардалди,  тIебии газдин 1 кубо­метр кура-кура маса гудай цIийи къи­мет  5 манатни 23 кепек яз  тайи­нарнава, хабар гузва “Газпром межрегионгаз Махачкала” ООО-дин пресс-къуллугъдин  векил Сапият Мегьамедовади.

“Газпром межрегионгаз Махачкала” ООО-ди абонентриз – газ ишлемишзавай ксариз  яшамиш жезвай чкайра авай участокра (абонентрин пунктара)  ишлемишнавай газдиз талукь делилар ахтармишуниз ва, эгер буржар алаз хьайитIа, абур вахтунда вахкуниз эвер гузва. Гьанра абонентривай чпин буржариз талукь месэлайрай меслятарни къачуз жеда.

Газ гьисабдиз къачудай при­борар тайинарнавай абонентри счетчикрал алай делилрикай  идарадиз хабар гун чарасуз я, тахьай­тIа, алай бурж цIийи къиметрай гьисаб хъийи­да, лугьузва идарадин векилди.

Сапият Мегьамедовади  гьакIни разивилелди къейд авурвал, алатнавай 5 йисан вахтунда, яни 2013-2018-йисарин вахтунда Да­гъустан Республикадин агьалияр патал  газдин къимет анжах 96 кепекдин багьа хьанва. Кьилди къа­чур­тIа,  2013-йисуз  1 кубометр газдин къимет – 4 манатни 27 кепек, 2017-йисуз  5 манатни 6 кепек  тир.

Эхирдай къейд ийин, “Газпром межрегионгаз Махачкала” ООО-ди абонентар патал, виликдай хьиз, агьалияр газдалди таъминарунин месэладиз  талукь “кузвай линия” кардик ква. Арадал къвезвай суалриз жавабар телефондин  8-800-200-98-04 нумрадиз зенг ­авуна  жагъуриз  жеда.

Чи мухбир


Всего просмотров: 99

Читайте также: