КьетIен гьалар кардик кутунва

“Лезги газетдиз” Дагъустандин Кьилин ва Гьукуматдин Администрациядин пресс-къуллугъди хабар гайивал, республикада 1-апрелдилай инсанар азаддаказ санай масаниз финал сергьятар эцигнава.

Владимир Васильева алай йисан 18-мартдиз кьабулай 17-нумрадин “Вини де­режада аваз гьазурвал акунин гьалар кардик кутун” приказдик бязи дегишвилер кух­тунва. Абурал асаслу яз, дагъустанвийриз диндин идарайриз, диндихъ галаз алакъалу адетар себеб яз гзаф кьадар инсанар кIватI жезвай чкайриз, республикадилай къецепатаз фин тавун меслятнава. Идалай гъейри, санитариядинни эпидемиологиядин гьалар хъсанарунин макьсаддалди тайин са игьтияж аваз куьчедиз экъечIайла маса инсанрилай 1,5 метрдин яргъа акъвазун чарасуз я.

Карантиндин жигьетдай кьабулнавай серенжемрикай рахайтIа, 1-апрелдилай инсанривай, РД-дин Гьукуматди гузвай махсус пропускар гвачиз чпин кIвалерай экъечIиз жедач. Республикадин Кьилин Указда къейднавай шартIарал асаслу яз, кIваляй махсус пропуск гвачиз анжах агъа­дихъ галай дуьшуьшра экъечIдай ихтиярар ава:

— эгер уьмуьр ва сагъламвал хаталувилик акатнаватIа ва я медицинадин рекьяй тади куьмек герек хьанватIа;

— кIвалахал физватIа (къейд ийин хьи, РФ-дин Президентди кьабулай Указдин бинедаллаз СМИ-дин, финансрихъ галаз алакъалу идарайрин, азарханайрин ва са жерге маса тешкилатрин кIвалах акъвазарнавач, абуру кье­тIен гьалара кIвалахзава);

— кIвалахдихъ галаз алакъалу яз республикада санай масаниз фин чарасуз ятIа;

— игьтияж авай метягьар маса къачузватIа;

— яшайишдин зирзибил гадарзаватIа;

— кIвалин гьайванар сейрдиз акъуд­заватIа (и дуьшуьшда кIваливай 100 метрдин яргъаз фидай ихтиярар авач).

Къейд ийин хьи, Дагъустандин Кьил Владимир Васильеван Указда къейднавай сергьятар духтурриз, къанун-къайда хуьдай органрин векилриз, МЧС-дин, яшайишдин рекьяй къуллугъар ийидай ва инсанрин сагъламвал, хатасузвал хуьнихъ галаз алакъада авай маса идарайрин векилриз талукь туш.

Владимир Васильеван буйругъдалди республикадин агьалийриз паркариз, ял ядай багълариз фин къадагъа авунва. Мисал яз, Махачкъалада “Октябрдин 50 йисан”, “Ленинан комсомолдин”, “Интернационалист аскеррин”, “Ак-Гель” паркар гьахьзавай чкаяр ракьун махсус жугъунралди агалнава.

РФ-дин Роспотребнадзордин РД-да авай Управленидин пресс-къуллугъди хабар гузвайвал, 1-апрелдиз авай де­лил­ралди, Дагъустанда коронавирус акатнавай инсанрин кьадар 15-дав агакьнава. Абур вири кьетIен гуьзчивилик ква ва са­гъар хъувунин серенжемар кьабулзава. ТIе­гъуьн акатнава лагьана шак физвайбур 30 кас ава. Абурукай пуд кас 65 йисалай виниз яшда авайбур я. И ксарик коронавирус акатнавани, акатнавачни тестикьарун патал анализар Москвадиз рекье тунва.

РД-дин Минздравдин пресс-къуллугъди хабар гузвайвал, тIегъуьн акат­на­ватIа чирун патал къенин йикъалди республикада 1397 кас ахтармишнава, 867 кас лагьайтIа, карантиндал ала.

Са шумуд югъ идалай вилик, уьлкведин хейлин регионра хьиз, Дагъустандани маскайрин патахъай кьитвал авай. И месэла гьялун патал республикадин са шумуд кархана маскаяр цваз эгечIна. Абурун арада Къизлярдин КЭМЗ заводни ава. Идакай анин генеральный директор Ибрагьим Ахматова гайи хабар “Дагъустан” РИА-ди раижна.

“Чи завод медицинадин маскаяр цваз эгечIна са шумуд югъ я. Чаз аквазвайвал, къенин юкъуз аптекайра абур кьит хьанва. Са сменада чна агъзурдав агакьна маскаяр цвазва”, — лагьана Ахматова.

Ада алава хъувурвал, санлай къачур­ла­, заводда 2 агъзурдалай гзаф ксари кIва­­лахзава. Адан гафаралди, заводдин къуллугъчийриз и маскаяр пулсуздаказ пайзава.

Къизлярда кардик квай “Концерн КЭМЗ” ОАО 1962-йисуз арадал гъана, ам асул гьисабдай “Сухой” авиациядин холдингдин тешкилатдин ва Россиядин самолетостроительный “МиГ” корпорация патал авиациядин техника туькIуьрунал ва арадал гъунал машгъул я.

Чи  мухбир


Всего просмотров: 64
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире