Кьехуьлрин хуьр арадал хкиз кIанзава

Булахриз яд хкведа

Мукьвара чпин бине Ахцегь райондин Кьехуьлрин хуьряй тир са шумуд касдикай ибарат десте муниципалитетдин регьберрихъ галаз гуьруьшмиш хьана. Абуру Кьехуьлрин хуьрел чан хкунин месэла ве­ревирдна.

Къейд ийин, и дагълух хуьруьн бинеяр Цуругърин хуьруьвай 6 километрдин яргъа экIя хьанва. Хуьряй куьч хьайибурун чIехи пай алай вахтунда Мегьарамдхуьруьн райондин Гилийрин хуьре яшамиш жезва.

Гъиле кьунвай месэладин гьа­къиндай Ахцегь райондин кьил Осман Магьмудова икI лагьана:

“Чпин бинейрал чан хкиз кIанза­вай ксарин гъавурда акьуна, абуруз куьмекар гана кIанда. Гадарнавай хуьрер арадал хкунихъ район патал еке хийир ава. Дагълара виридаз бес кьадар чилер ацIанва. Вири сад хьунилай пара крар аслу я. И кардани чна сада-садаз куьмекар гун, гъил-гъилеваз кIвалахун ча­расуз я. Республикадин кьилевайбуруни дагълух хуьрера яша­йиш хъсанаруниз, къулай шартIар арадал гъуниз фикир гузва…”.

Райондин кьили авур рахунри гуьруьшдин вахтунда арадал атай гьуьжет алай са жерге месэлаярни арадай акъудна.

Кьехуьлвийрин дестедин кьиле авай Р.Селимова хуьрел чан хкун патал гьазурнавай махсус программа авайдакай ва ам федеральный “Возрождение горных территорий” программадик кутун чарасуз тирдакай лагьана.

Осман Абдулкеримова райондин администрациядин жавабдар къуллугъчийриз РД-дин госпрог­рам­­мадал бинеламиш хьана, гадарнавай хуьрерал чан хкунин макь­саддихъ элкъуьрнавай муниципалитетдин программа арадал гъунин ва и месэладал гуьзчивал тухудай махсус дестени кардик кутунин тапшуругъар гана.

Гила къванер кIватI хъийидай вахт алукьнава. Мегьарамдхуьруьн районда кьве хуьрел (Чахчар, Макьар) чан хканва. Аферин а хуьрерин жемятриз! Дагълух Кьехуьлрин булахризни ятар хкведайдан чун чIалахъ я.

М.Мустафин


Всего просмотров: 24

Читайте также: