Къазахстанда лезги шаирриз бахшнавай межлис кьиле фена

Мярекат лезгийрин «Самур» тIвар алай этнокультурадин кIватIалди тешкилнавай. «Актаудин ва Мангистаудин цIийивилер» газетди хабар гузвайвал, межлис лезгийрин медениятдин деятелар тир Седакъет Керимовадиз ва Сажидин Саидгьасановаз бахшнавайди тир.

Седакъет Керимова – лезгийрин шаир, писательница, драматург ва «Самур» тIвар алай манийрин ва кьуьлерин ансамбль тешкилайди, адан художественный руководитель, гзаф кьадар документальный, этнографический фильмайрин, сценарийрин автор ва режиссер я. Ада 100-далай гзаф манияр кхьенва, абур Азербайжандин ва Дагъустандин машгьур манидарри лугьузва.

Сажидин Саидгьасанов –  шаир, писатель, драматург, общественный деятель, РФ-дин писателрин ва журналистрин союзрин ва лезги писателрин Союздин член я. Адан хейлин эсерар са шумуд чIалаз таржума авунва.

– Мярекат Астанадин 20 йис ва Актау шегьердин 55 йис тамам хьунин сергьятра аваз тешкилнавай. Сегьнедал Азербайжандай, Дагъустандай тир ва гьакIни  чкадин бажарагълу ансамблри чпин яратмишунрин нумраяр къалурна. Концерт лап хъсандиз кьиле фена. Икьван гзаф инсанар садрани акурди туш. Зал инсанрай ацIанвай, гьавиляй хейлин мугьманри концертдиз кIвачин кьилел акъвазна яб гана. Гьар са нумра капар ягъуналди къаршиламишна. Икьван гзаф инсанар къведа лагьана фикирнавачир. Чна гьар йисуз гьа ихьтин тешкилатрин серенжемар кьиле тухузва эхир. Анриз кIватI жезвайбурун кьадар 60 касдив агакьзавай, – лагьана вичин фикирар лезгийрин «Самур» тIвар алай этнокультурадин тешкилатдин председатель Гьажи Селимова.

Гьайиф хьи, Сажидин Саидгьасановавай яратмишунрин межлисдиз къвез хьанач. Амма межлисдин мугьманри вахт лап хъсандиз акъудна ва «Шадвал» ансамблдин, Азербайжандай ва Дагъустандай тир мугьманрин рахунрикай, манийрикай лезет хкудна.

Азербайжандин ва Дагъустандин лайихлу артистка, халкьдин манидар Жамиля Заловади вичин са шумуд манини лагьана.

Чи мухбир


Всего просмотров: 105

Читайте также: