Ина вини дережадин пешекарар гьазурзава

Бязи уьлквейри Россиядиз виниз тир технологийралди бинелу тадаракар маса гунал къадагъаяр эцигнавай алай девирда экономикадин жигьетдай жуван аслу туширвал таъ­­минарун патал чна  инженервилин пешекарар гьазурунин дережа хкажунин технологийрин жигьетдай дегишвилер кьиле тухунин чарасузвал арадал къвезва.

И кар аннамишзавай Дагъустандин государстводин техуниверситетди (ректор эконо­микадин илимрин кандидат, доцент Суракатов Нурмегьамед Сайпу­лаевич) республикадин, санлай уьлкведин халкьдин майишатдин жуьреба-жуь­ре хилер патал  инженервилин кадрияр гьазурзава. Вузда 11 факультет ава, Дербент, Кас­пийск ва Къизляр шегьерра адан филиаларни кардик ква. И вузди программистар, энергетикар, технологар, архитекторар, эцигунардайбур, радиотехникар, нафтIадинни газдин рекьяй пешекарар, гьакIни таможенникар ва экономистар гьазурзава. ДГТУ куьтягьай пешекарри чи ва къецепатан уьлквейрин карханайра ва идарайра кIвалахзава. Вич кардик кваз алатнавай девирда вузди 50 агъзур касдилай виниз пешекарар гьазурна.

Университетда чирвилер гунин ва илимдинни ахтармишунрин кIва-лахдал халкьдин майишатдин  жуьреба-жуьре хилерин пешекарар тир ксарни желбзава. Абуру неинки тарсар гузва, гьакIни вуздин къурулушдик акатзавай подразделенийрин кьилени акъвазнава. ДГТУ-ди 27 карханада вичин кафедраяр, илимдинни ахтармишунардай лабораторияр тешкилнава. Ада Москвадин, Санкт-Петербургдин, Россиядин чIехи ма­са­ шегьеррин ва къецепатан уьлквейрин гьуьндуьр дережадин вуз­рихъ­ галаз санал кIвалахунин гьакъиндай икьрарар кутIуннава.

Вузда илимдинни ахтармишунардай институтар кардик ква: “Микроэлектроника ва нанотехнологияр”, “Информационный технологияр ва телекоммуникацияр”, “Ярумчух проводникар тир термоэлектрический алатар” ва мсб. Идалайни гъейри, проектрин илимдинни ахтармишунардай организацийрихъ ва карханайрихъ галаз санал кIвалахзавай  чирвилер гудай ва илимдин махсус 10-далай виниз центраярни ава.

Студентар, сифтегьан курсарилай башламишна, илимдин  ахтармишунрал желбзава. Абурукай виридалайни бажарагълубур Россиядин гьуьндуьр дережадин грантриз, РФ-дин Президентдин, РФ-дин Гьукуматдин, РД-дин Кьилин стипендийриз лайихлу жезва. Вуз акьалтIарай хейлин жегьилри ана кардик квай аспирантурада агалкьунралди илимдин кIвалах давамарзава.

ДГТУ-дин студентри ва муал­лимри туькIуьрай цIийи шейэр ва абуру гайи карда цIийивилер туниз та­лукь теклифар чIехи конкурсра­ гъа­либ хьана. Инал Москвадин цIийиз­­ туькIуьр­навай шейэрин ва цIийивилер тунин технологийрин международный “Архимед” салондикай, Болгарияда  кьиле тухузвай технический мекерадикай (ярмаркадикай), Румынияда тешкилзавай цIийи шейэрин выставкадикай, техникадин ва технический агалкьунрин мекерадикай (Сербия), Швейцарияда кардик квай цIийи шейэриз талукь салонрикай, цIийиз акъуд­навай шейэрин гран-при “Эйфель” салондикай рахун кутугнава. Тек са 2019-йисуз  университет ихьтин дережадин мярекатра 20-далай виниз шабагьриз лайихлу хьана. Студентри  ЮФО-дин ва СКФО-дин вузрин арада кьиле тухузвай олимпиадайра  лайихлудаказ векилвалзава.

ДГТУ — им неинки чирвилер гудай­ ва илимдин центр, гьакIни жегьилрин руьгьдин къамат арадал гъизвай чкани я.

Вузда жуьреба-жуьре серенжемар — гуьруьшар, форумар, элкъвей столар, ватандашвилинни ахлакьдин тербия гунихъ элкъуьрнавай суьгь­бе­тар тешкилзава, игьтияж авайбуруз куь­мек гудайбурун, донорвилин ва чун элкъуьрна кьунвай тIебиат хуьнин­ кIвалах машгьур авунин, яша­йиш­дин метлеб авай идарайрал къаюмвал авунин серенжемар кьиле тухузва.­

ДГТУ-дихъ спортзалар, стадионар, студентрин клуб, столовояр, сир­навдай бассейн ава. Игьтияж авай студентриз  общежитийра чкаяр гузва. ДГТУ-дин студентривай чпин сагъ­ламвал вуздин санаторийда-про­филакторийда, гатуз лагьайтIа, Каспий гьуьлуьн къерехда авай спорт­дин­ни сагъламардай “Политехник” лагерда мягькемариз жеда.

Дагъустандин государстводин технический университетда вуздини промышленностдин чIехи карханайри илимдинни ахтармишунрин барадай санал кIвалахун гегьеншарунихъ элкъуьрнавай чIехи программа кьилиз акъудзава. Ихьтин амадагвилин проектар уьмуьрдиз кечирмишуни илим цIийи дережадиз хкаждай, Россияда производство виниз тир технологийрин бинедаллаз цIийи хъийидай мумкинвал гуда.

Чи мухбир


Всего просмотров: 73
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире