Хуьруьга пианистрин конкурс кьиле фена

11-апрелдиз Хуьруьгрин хуьре, мергьяматлувилин “Просвещение” фондунин “Люминари” центрада, райондин жегьил пианистрин Рагьимат Гьажиевадин тIварунихъ галай сифте конкурс кьиле фена. Райондин руководстводин гуьзчивилик кваз Ахцегьрин музшколади (ДМШ) тешкилай и серенжемдин мурад-метлеб аялар классикадин музыкадиз шерик авун, жегьил музыкантар руьгьламишун, абурун устадвал хкажун тир. Конкурсда Ахцегьрин, Луткунрин музшколайрин ва райондин искусствойрин школадин  ученикри иштиракна.

Конкурс, сифте гаф рахуналди ва адан иштиракчияр, тамашачияр, жюри тебрикуналди, Ахцегьрин Рагьимат Гьажиевадин тIвару­нихъ галай ДМШ-дин директор Абдулкерим Рагьимова ачухна. Ада кIватI хьанвайбур конкурсдин жюридихъ (председатель — Дербентдин музучилищеда пианинодин тарсарин муаллим Тамара ­Сулейманова) галаз танишарна ва  сифте гаф “Ахцегь район” муниципалитетдин кьилин заместитель Алмас Шуаеваз гана.

— Ахцегь район, маса рекьерай хьиз, искусстводин устадралдини, ба­жарагъ­лу­ музыкантралдини девлетлу я. Вичел “Лез­ги билбил” тIвар акьалтай РД-дин ва РФ-дин халкьдин артистка Рагьимат Гьажиевадилай (Дагъустанда ам манидарвилин искусстводин ку­кIушрив агакьай сад лагьай дишегьли я), сифте балерина, Дагъустандин лайихлу артистка­ Алла Жалиловадилай ва пара маса бажарагърилай къенин несилди чешне къа­чунин алахъунар акваз зун пара шад я. Къведай­ йисалай и гуьзел конкурс рес­­публи­кадин дережада кьиле тухун патал чна зегьмет чIугвада…, — хуш кели­майрихъ галаз санал ада райондин регьбер, мяре­катдин тешкиллувилин комитетдин председатель Осман Абдулкеримован, депутатрин райсобранидин председатель Абдул-Керим Палчаеван ва вичин патай жегьил пианистар тебрикна, абуруз музыкадин искусстводин рекье хъсан гележег жедайдахъ инанмишвал къалурна.

Мергьяматлувилин “Просвещение” фондунин президент, РД-дин лайихлу муаллим, конкурсдин спонсор Магьмуд Абдулкеримова къейд авурвал, ихьтин серенжемри, шаксуз, чи аялар руьгьламишзава, абур чпи хкянавай искусстводин рекье агалкьунар къазанмишунал гье­весламишзава. Чи буржи и карда абу­руз алакьдай куьмекун я.

Хуьруьн чкада жегьил пианистрин килигунарни конкурсар тухунин важиблувиликай Дербентдин музучилищедин муаллимар тир Тамара Сулеймановади, Са­мур Эмирбегова, райондин культурадин управленидин начальник Къистер Гъаниевади ва масабуру чпин фикирар лагьана.

Мярекатдин конферансьевал еке устадвилелди Ахцегьрин 1-нумрадин юкьван школадин ученица, хъсан пианист Ами­на Алискеровади авуна. Рахунрилай кьулухъ ада сегьнедиз сад-садан гуьгъуь­наллаз жегьил музыкантриз (абур, яшарин­ 3 дестедиз пай хьана, 40 кас авай) теклифна.

Чпин везифайрив жавабдарвилелди эгечIай жюриди гъвечIи, юкьван ва чIехи яшара авай (8-10, 11-13, 14-17 йисар) аялрин арада лап хъсан пианистар тайинарна ва абуруз талукь тир дережайрин дип­ломарни пулдин пишкешар гана. ИкI, Шерифа­лиев­ Муслима, Агьмедов Ме­гьа­­меда ва Алискерова Дианади (Ахцегьрин ДМШ, му­ал­ли­мар — Сели­мат Велиева, Эльвира Мегьамедова) — 1, Сулейманова Лейлади, Ра­ма­­занов Артура­ (Луткунрин ДМШ), Сулейманова Заринади (Ахцегьрин ДМШ) 2-чка­яр кьуна. Мукаилова Шейрибан (искусствойрин школа), Ражабова Гьуьри­зат­ (Луткунрин ДМШ) ва Агьмедова Фа­ти­ма­ни­ (Ахцегьрин ДМШ) Шамурханов Равиль (Лут­­кунрин ДМШ) 3-чкадиз лайихлу хьана.­

Дашдемир Шерифалиев


Всего просмотров: 28

Читайте также: