Хуьрер аваданламишун давамарзава

Райондин жемятдин яшайишдин шартIар хъсанарунин, мулкар абадунин мярекатрин сергьятра аваз, Мегьарамдхуьруьн районда хуьрерин рекьер хъсанарунин кIвалахар датIана кьиле физва. Идакай «Лезги газетдиз» райондин администрациядин пресс-къуллугъди хабар гузва.

И йикъара Хъартас-Къазмайрин Шоссейный куьче хъсанарунин кIвалахар кьиле фена. Талукь тир техникадин куьмекдалди ремонт авуникди куьче кутугай гьалдиз хтана, дигидай яд тухунин гереквал авай чкайрик асбестдин турбаярни кутуна.

Хуьруьн поселенидин кьилин регьбервилик кваз кьиле фейи кIвалахра жемятдини хушуналди иштиракзава. Идалай вилик хъвадай цин къуй ремонтунин кIвалахарни саналди тешкилнай.

Чешмеди алава хъийизвайвал, ихьтин жуьредин кIвалахар Ярагъ-Къазмайрин хуьрени кьиле фена. Кьилди къачуртIа, салариз дигидай яд акъудунин гереквал авай рекьин участокрик асбестдин турбаяр кутуна, хуьруьн парк зирзибилрикайни эчIелрикай михьна, куьчейра йифиз экв гудай лампаяр дегишна ва икI мад.

Советский хуьруьн администрациядини хуьруьнвийрихъ галаз санал дигидай цин къанал михьунин кIвалахар кьилиз акъудна. Ихьтин жуьредин кIвалахар мадни давамардайвал я.

Чи мухбир


Всего просмотров: 11

Читайте также: