ЦIийикIа туькIуьр хъийида

12-мартдиз РД-дин Гьукуматдин Председателдин Сад лагьай заместитель Гьажимегьамед Гьуьсейнован регьбервилик кваз “Хатасуз ва ерилу автомобилрин рекьер” милли проект уьмуьрдиз кечирмишунин рекьяй Проектный комитетдин заседание хьана.

Региондин проект уьмуьрдиз кечирмишзавай гьал веревирдна, кар алай месэлаяр тайинарна, гьакIни  региондин проектдин паспортдик чарасуз кухтун лазим тир алавайрикай ва дегишвилерикай лагьана.

Санлай къачурла, республикадин Сад лагьай вице-премьердин гафаралди, проектдихъ яшайишдин рекьяй зурба метлеб ава, гьикI ла­гьайтIа, регион нормативный истемишунрив кьадай рекьералди таъминарун лазим я. “Чна и терефдихъ жезмай кьван ерилудаказ кIвалахна кIанда, такьатар ава, кар алайди жавабдар ксари, гъил-гъиле кьуна, менфятлудаказ кIвала­хун я. Чи асул заказчи Махачкъа­ла­ я, гьикI ла­гьайтIа планламишнавай серенжемрин чIехи пай ­меркездал гьалтзава”, — къейдна Гь.Гьуь­сейнова.

Региондин программадин сергьятра аваз кIвалахрин асул кьадар, талукь яз — такьатарни, Дагъустандин меркездал гьалтзава. Им 72-далай гзаф шегьердин рекьер я, гьикI лагьайтIа, и рекъем,  республикадин транспортдин министерстводин регьбердин фикирдалди, савда ийидай вахтунда такьатар кьенят авунин не­тижада, мадни артух хьун мумкин я; и карди Махачкъала шегьердин 57 километр къенепатан куьчеяр ремонтдай мумкинвал гуда. Идалайни гъейри, республикадин метлеб авай автомобилрин кьве рехъ ремонт ва цIийи­кIа туькIуьр хъувун планламишнава. 2019-йисуз ремонтдай рекьерин  яргъивал 66,4 километрдиз барабар жеда.

Къейд авурвал,  региондин проектдик кухтунвай туькIуьр хъувунарни гьисаба кьурла, финансламишунин умуми кьадар 10 миллиард манатдилай гзаф планламишнава, идакай 6 миллиард манат федеральный бюджетдин такьатар я. Алай йисуз республикадин ва меркездин рекьер къайдадиз гъун патал 1,5 миллиард манат харжун планламишнава. Фотофиксациядин камераяр ва пар чIугвадай автотранспортдин заланвал алцумдай — чирдай такьатар эцигунизни кьилди пул чара авунва.

Совещанидин сергьятра аваз проектдин кIвалахдин план-график, кар алай объектрин сиягь, проектдинни сметадин документация, аук­цион жедай ва икьрарар кутIун­дай вахтар тайинарна.

«Лезги газет»


Всего просмотров: 24

Читайте также: