Хатасузвал таъминарун патал

Махачкъалада газдин тадаракар ишлемишунихъ элкъуьрнавай проект уьмуьрдиз кечирмишда. Дагъустандин Кьил Владимир Васильеван регьбервилик кваз кьиле фейи совещанидал республикадин кIвалера ва квартирайра ишлемишзавай газдин тадаракрин хатасузвал таъминаруниз талукьарнавай ихьтин къарар кьабулна.  Идан гьа­къиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

Проект уьмуьрдиз кечирмишун патал Махачкъала хкягъунин себеб ам я хьи, региондин меркезда газ ишлемишзавайбурун кьадар, маса муниципалитетрив гекъигайла, гзаф я.

“Чна вучиз пилотный проект хкянава? Чавай садлагьана виридаз финансар гуз жедач, чал и карда четинвилер гьалтда, амма пилотный проект чавай таъминариз жеда”, — къейдна Владимир Васильева.

Идалайни гъейри, Дагъустандин Кьили властдин органрал ва жавабдар къуллугърал республикада газдин тадаракар ишлемишунин карда хатасузвилин кIвалахар мадни гегьеншарун тапшурмишна. Ада гьакI рикIел хкана хьи, Дагъустан газдалди таъминарунин къурулуш четин гьалда ава, гьавиляй и месэла гьялунив лап рикIивай эгечIна кIанда.

Арадал атанвай четин гьалдин себебрин гьакъиндай РД-дин Гьукуматдин Председателдин заместитель Владимир Лемешкоди суьгьбетна. Ада газдин приборрин технический гьал ахтармишунрин кIвалах хъсанди туширди, республикадин агьалийрин кIвалера ва квартирайра авай газдин тадаракар ишлемишунин нормативный  вахтар  алатнавайди, гьакIни муьштерийри газ ишлемишунин къайдайрал амал тийизвайди къейдна.

Вице-премьерди гъайи делилрал асаслу яз, алай вахтунда региондин гзаф квартирайрин кIвалера 70 процент куьгьне ва ишлемишнавай газдин  тадаракар эцигнава.

Идахъ галаз алакъалу яз Владимир Васильева Дагъустандин агьалийрихъ галаз жавабдар къуллугъри кьиле тухузвай гъавурдик кутунин кIвалах хъсанди туширди къейдна. Региондин Кьили гражданрихъ галаз датIана ­гуьруьшмишвилер тешкилун ва икьрарар кутIунунихъ гьихьтин  артуханвал аватIа гъавурдик кутун чарасуз тирди къейдна.

«Лезги газет»


Всего просмотров: 27
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире