Халкьдин къуллугъда

И йикъара Мегьарамдхуьруьн райондин Советский хуьруьз са дерди аваз фейи заз “Ростов-Баку” шегьре рекьин  кьве патани эцигнавай гьар жуьредин  алвердин туьквенриз фидай мумкинвал хьана. Сад-садалай артухдиз аквадайвал, гуьрчег кхьинарни алаз, туькIуьр­на­вай са шумуд туьквендиз фейи­далай кьулухъ зи вил кьве мертебадин дараматда акьуна. Анал, яргъайни кваз аквадайвал, “Эконом” кхьенва. 

Зун 1-мертебадиз гьахьна. Ина михьи­  ва экуь тир. Вири шейэр дезгейрал гьасятда ви­ле акьадайвал эцигнавай. Са же­гьил итимди туьквендин  иеси вич  я лагьана.

Гьабибов  Фаргьад  Гьабибуллагьович  1970-йисуз Мегьарамдхуьруьн райондин Советский хуьре  дидедиз хьана. 10-класс куьтягьна, Саратовда хуьруьн майишатдин институтдик экечIна. Са йисуз кIелайдалай кьулухъ ам Советрин Армиядин жергейриз тухвана. Буржи тамамарна хтай 1992-йисуз жегьилди институт агалкьунралди куьтягьна, зегьметдин рехъ инженер-мелиораторвиле  кIвалахунилай башламишна.

Фаргьадан гафарай малум хьайивал, алвердин кIвалах адан рикIе гьеле гъве­чIи чIаварилай авай. Къурулушар, гьукуматдин къайдаяр дегиш хьайила, кIвалах амачир гзафбур хьиз, амни алвердив эгечIна. Сифте куьлуь кIвалахар авуна, гуьгъуьнлай вичин хсуси харжидалди  халкьдин къуллугъда акъвазна­вай­ чIехи туьквенар эцигна, кардик кутуна.

“Эконом” туьквен Советский хуьруьн къекъуьндал алай чIехибурукай сад я. Ина, 1-мертебада, кьилин чка недай-хъва­дай шейэри кьазва. Вахт алатнавай­ продуктар дезгейрал тазвач. 2-мертебада — экуь залра —  жегьилриз  мехъерардайла ва кIвализ герек вири шейэр ава. Маса гузвай шейэр, вири документар га­лаз, гьар­ жуьредин  фирмайрай хкизва­. Муьш­териярни ава. Туьквенда 20-да­лай виниз жуьреба-жуьре къуллугъчийри кIвалах­за­ва, абурухъ герек  чирвилерни ава. Ана Гьабибова Заремади ва Байрамова Рафидади тафаватлувилелди зегьмет чIуг­вазва. Абурун ва амай къуллугъчийрин кIвалахдилайни муьштерияр рази я.

Вадим Жамалдинов


Всего просмотров: 86

Читайте также: